Kur dhe numri është (kundër)argument!

Vërtet që jo gjithnjë numri përbën argument në mbrojtjen  e një ideje a kauze, siç idetë dhe kuazat jo gjithnjë kushtëzohen nga numrat; pra treguesit shifror të mbështetësve apo ndjekësve. Tek protesta e së premtes, si provë e vetme dhe kryesore  e suksesit ose e dështimi të saj, është marrë numri i njerëzve në rrugë. Dhe gjykuar prej masës së frymorëve protestues, sigurisht që ishte një dështim ashiqare.

Në raport dhe me turin e Bashës  në disa qytetet për t`i dhënë adrenalinë politike mbështetësve; në raport dhe me të mëshuarit e faktit nga ana e Berishës se ishin 150 mijë, e si të Bashës se kuaza e tyre gëzon një shumicë morale. PD-ja është themeluesja e mitingjeve. Ato kanë qenë forca e saj, performanca e fuqisë së saj. Kjo, falë populizmit të Berishës. Pa turmat e ekzaltuara, ai nuk jeton dot, nuk kuptohet dot. Po ashtu dhe PD-ja. Mirëpo ja që ka ardhur një kohë tjetër. Një kohë që të pakët kanë mbetur ata që ta fishkëllejnë për të dalë për çdo palo sebep në sheshe.

Dy BB-të, edhe pse patjetër duhet ta dijnë teorikisht se çdo gjë është e bazuar në kohë, po tentojnë ta sfidojnë këtë ligjësi, për shkak të dominimit të nervozes mbi logjikën e gjërave. Për këtë arsye meritojnë të quhen tapë. As këmbët nuk u mbajnë e as logjika nuk u funksionon. Qeverisja do kohën e vet për të patur kurbën e ngjitjes, kulmin e më pas rënien; po kështu dhe opozita, që është e kushtëzuar nga faktori kohë për të ardhur në vete, që do të thotë më së pari t`i dalë pija, të ftillohet e të nis rehabilitimit drejt të qënit faktor i besueshëm. Vendi nuk mund të mbetet peng i perceptimeve të PD-së mbi qeverisjen dhe Shqipërinë.

Po të qe për perceptimet e saj dhe posaçërisht Berishës, Shqipëria ishte mirë nën komunizëm, të cilit ai i shërbente me zell të madh. E nëse jo në komunizëm, mjaft të ishte vetëm ai në pushtet pavarsisht sistemit, gjë për të cilën harxhon gjithë energjitë. Mazhoranca nuk e ka kontratën me opozitën për çfarë ka premtuar e çfarë po bën; e ka me votuesit. Dhe ballafaqimi, është njëherë në katër vjet. Këtë e tha troç dhe shifra e pjesëmarrësve në protestën e së premtes!