A mund të pjellin burrat një ditë?!

Kë ditë që paralel me debatin politik, vlon dhe ai me substrat erotik; pikërisht mbi homoseksualët. Deri më tani, mbrojtësit e kësaj kategorie, e kanë përligjur qëndrimin e tyre mbi shenjtërinë e lirisë së zgjedhjes, pa u marrë shumë  me argumenta të llojit shkencor, fiziologjikëapo social qofshin ato. Një rrekje të tillë ka bërë së fundi publicisti e profesori i komunikimit, Gilman Bakalli, i cili e ka quajtur martesën (por duhet veçuar: atë  burrë e grua), si forcë zakoni të shoqërisë, që një ditë dhe mundet të mos mbetet e tillë. Zakoni e forca  e tij, janë çështje etike e jo ligjësi. Bota si funksion natyror nuk ekziston në bazë të etikës, por të ligjësive. Por etika njerëzore, veçanërisht ajo që buron nga dimensioni i lirisë së zgjedhjes, ka ndikim në disa ligjësi, që nuk mund t`i ndryshojë ato, por t`i kompromentojë rëndë. Etika njerëzore nuk ka asfare ndikim në faktin që 2 plus 2 baraz 4, por ana e errët e qënies së tij, nxjerr përfundime nga më të ndryshmet, duke u nisur nga egoja që sfidon logjikën.   Njeriu nuk ka dorë të ndryshojë formulën e ujit si bazë e ekzistencës së jetës, që nga H2O ta bëjë H4O; por ama e keqmenaxhon atë si nevojë njerëzore. Ai nuk ka në dorë që thithjen e oksigjenit dhe nxjerrjen e dioksidit të karbonit, ta kthejë në të kundërt; por ama e ndot për dreq ajrin që thith.

E gjitha bota, universi, galaktikat, nuk ekzistojnë në bazë të formulave e ligjësive që burojnë nga një liri zgjedhjeje e ndonjë homosiapensi, por janë logjikë sublime, që tejkalojnë limitet njerëzore. Sepse mendoni për një çast sikur njeriut t`i lësh në dorë menaxhimi diellit. “Liria” e tij për ta afruar kaq apo larguar aq nga toka, patjetër  do e kish zhdukur në çast botën. Kjo  liri nuk funksionon dhe në rastin kur njeriu ndërton diçka, ku ndjek rreptësisht rregullat e logjikës sublime, siç është fjala vjen, futja e bullonit në dado, pasi përndryshe, asgjë e bazuar në ligjet e mekanikës nuk funksionon.  Martesa burrë e grua, as tradicionale nuk mund të quhet, pasi dhe tradita është çështje etike. Ajo është ligjësi. Ligjësi e ekzistimit të jetës. Sepse po të quhej forcë zakoni martesa, forcë zakoni mund të quhej më pas dhe dhënia sisë foshnjës nga nëna, por që mund t`i jepet dhe nga babai! Ose më rëndë akoma, të quhej forcë zakoni mbetja shtatzënë e nënës, por që mund të mbetej një ditë dhe babai! E nëse këto janë ligjësi e logjikës sublime, si mundet që një proçes që është pjesë e kësaj ligjësie, të jetë thjesht çështje etike e pjesë e lirisë së zgjedhjes???!!!