‘Nuk përbën rrezik’, Apeli liron gjeneralin Syrja Gjoka

Me argumentin se nuk përbën rrezikshmëri shoqërore dhe se ka probleme shëndetësore, Gjykata e Apelit Vlorë ka liruar dje nga burgu gjeneralin Syrja Gjoka, u akuzuar për “shpërdorim detyre” dhe dëm ekonomik 6 milionë lekë. Madje në vendimin e djeshëm, gjykata e ka cilësuar arrestimi oficerit të lartë si të nxituar dhe të paligjshëm. Gjenerali Gjoka, që në momentin e arrestimit mbante postin e Komandantit të Logjistikës në Tiranë, ndodhet prej 4 ditësh në spitalin e Beratit, për shkak të problemeve kardiake. Avokati kërkoi nga trupi gjykues që të merren parasysh gjendja shëndetësore e gjeneralit, pozicioni i tij si ushtarak në poste të larta dhe që nuk përbën asnjë rrezikshmëri shoqërore apo për arratisje. Pavarësisht kësaj, gjykata ka lejuar prokurorinë që ta hetojë Gjokën për akuzën që i ka ngritur, por në gjendje të lirë deri në fund të procesit. Edhe në masën e sigurisë që u zhvillua në Berat, gjenerali e quajti arrestimin e tij të paligjshëm dhe pa prova, duke kërkuar lirimin nga qelia. Por Shkalla e Parë konfirmoi masën e sigurisë “arrest në burg” të kërkuar nga Prokuroria. Gjoka akuzohet për periudhën 2011-2012, kur mbante postin e Komandantit të Bazës Ajrore në Kuçovë, pasi ka dhënë urdhër në mënyrë të jashtëligjshme, duke falsifikuar dokumentet e Komisionit, për shkatërrimin e shtatë objekteve të ndryshme të ushtrisë.

Arrestimi i Syrja Gjokës, me gradë ushtarake “Gjeneral Brigade”, i cili ushtronte aktualisht detyrën e komandantit të Logjistikës në FA, ka ardhur pas kërkesës së Prokurorisë së Rrethit Gjyqësor Berat, e cila prej disa muajsh e kishte vënë nën hetim. Sipas prokurorisë, Gjoka akuzohet se në periudhën kohore 2011-2012, kohë kur ka qenë me detyrë Komandant i Bazës Ushtarake të Aviacionit në Kuçovë, i ka shkaktuar shtetit një dëm prej 6 milionë lekësh të reja, nga prishja e disa objekteve, pronë e Ushtrisë.
Sipas burimeve nga Prokuroria e Beratit, gjenerali Syrja Gjoka dyshohet se është përgjegjës për shkatërrimin e 7 objekteve të Forcave të Armatosura në Kuçovë, pa marrë leje nga strukturat eprore, Komandës së Forcës Ajrore Tiranë. Gjithashtu, në të gjitha rastet, komisioni i prishjes së objekteve të pamiratuara nuk ka konstatuar materiale me vlera magazinimi. Gjeneral Gjoka, komandant i Brigadës Logjistike në Tiranë do të hetohet në gjendje të lirë, pasi Gjykata e Apelit të Vlorës ka ndryshuar masën e arrestit ndaj tij. Por mësohet se edhe Ministria e Mbrojtjes e ka denoncuar Gjokën për të tjera vepra penale të konsumuara gjatë kohës që mbante detyrën e Komandantit të Logjistikës në FA, pas vitit 2012. Ai është denoncuar së bashku me një grup tjetër ushtarakësh të lartë, përfshi ish-shefin e Shtabit Xhemal Gjunkshi dhe atë të SHIU, Ylli Zyla.