SHËNIM / A mos psherëtihet vallë në PD: Ah të ish’ Ristani kryeprokuror!

Ngjan me pedofilizëm politik kjo që po bën PD, që prej dy ditësh, zgjedh Laurën, rininë, hiret dhe nurin e saj, për të sfumuar një çështje kaq burrërore siç është droga, trafiku i përfolur i saj dhe faktet e dala së fundi që ky trafik është bërë në periudhën e fundit të qeverisjes së Berishës me po atë lehtësi e sportivitet që një amvisë gatuan petulla shtëpie. Dhe siç ai plaku gojëçapraz tek  ‘14 vjeç dhëndër’ që pyet Gjinon se ç`ka Vangjeli që nuk del nga shtëpia, pas lajmit se Marigoja ka mbetur shtatzënë, shumë njerëz pyesin se ç`ka Berisha që nuk flet e Luli po ashtu?!

Po Ben Imami nga ka humbur?! Të tillë meshkuj, nëse ndjejnë që gëzojnë dhe statusin e burrit, po të atij që burrnia i buron prej nderit e ndershmërisë, nuk duhet ta privonin zëdhënësen e tyre nga pushimi në fundjavë për të lexuar deklarata shtypi si krijime të sforcuara poetësh provincialë ngjashëm me vargjet e Berishës në të ritë e tij, por t`i dilnin vetë për zot situatës. Zbythja e tyre këto dy ditë ngjan me ato aktet makabre të mburrojës me gra e fëmijë në vijën e parë të frontit.

Ndoshta në “tunelet e nëndhshme” të PD-së, që për paradoks janë në katin e 14-të, po gatuhet tashmë skema e një kundërsulmi, ku hidhen piketa, bëhen përllogaritje, shënohet diçka me laps që më pas fshihet me gomë; mendohet se si e qysh, në ajër ndihen psherrëtima pa fund ndjesish të sikletshme e patjetër skërrmitje dhëmbësh. Mund të jetë afërsisht e njëjta situatë si pas daljes së rezultatit në kutinë e fundit të njësisë numër 5 në zgjedhjet lokale të 2011, ku u pa se Basha kishte humbur, që më pas të hartohej skema e bërjes fitues me çdo mënyrë e me çdo kusht. Por ja që kryeprokuror nuk është Ristani, siç ishte atëherë në krye të KQZ-së. Dhe, a mos ndoshta tani në PD psherrëtihet me dhimbje: Ah të ish Ristani kryeprokuror!