Il Messaggero: Italianët po shkojnë të kërkojnë punë në Shqipëri

Nga Angela Padrone

Kanë kaluar pak më shumë se 20 vite, por duket si një shekull. Ishte vera e vitit 1991 kur anija Vlora, e mbushur plot me shqiptarë të dëshpëruar, mbërriti në portin e Barit. Sot nuk vijnë më ngarkesa të tilla nga bregu tjetër i Adriatikut, emigrantët shqipëtarë ndjekin rrugë ligjore dhe në Itali janë rreth gjysëm milioni. Në të kundërt tani edhe italianët, gjithnjë e më shpesh, kalojnë Adriatikun, në kërkim për një punë dhe për një jetë të re. Nuk e bëjnë këtë të hipur në anije të ndryshkura, por me avion, një orë fluturim. Italianët tashmë shkojnë në Shqipëri në kërkim të pasurimit.

Të dhënat zyrtare të qeverisë shqiptare thonë se janë rreth 19 mijë italianët që kanë një leje qëndrimi për punë ose studim. Një shifër e konsiderueshme për një vend me pak më shumë se tre milionë banorë. Nga universiteti tek “call center”-at, nga restorantet tëk ndërmarrjet e vogla, italianët  janë rritur ndjeshëm.

“Një boom i vërtetë. Disa thonë se është për shkak të krizës në Itali, por edhe për shkak të rritjes së Shqiprisë nëpërmjet imigrantëve të saj. Kush e di se sa shqiptarë që punojnë në Itali, ndoshta në një piceri, kanë bërë ndërmjetësin dhe kanë bindur sipërmarrësin e vogël italian që të investojë në anën tjetër të Adriatikut”, komenton Rando Devole, sociolog shqiptar dhe bashkëpuntor i Observatorit të Ballkanit. Në Tiranë gati që të gjithë flasin italisht, dhe në televizion gjendet edhe një ish-fytyrë e njohur e Mediaset, Alessio Vinci, sot një nga yjet e “talk show”-ut shqiptar.

Pensionistë dhe Studentë

Ndërmarrjet italiane që janë vendosur në krahun tjetër të Adriatikut janë rreth 500-600. “Ka një lëvizje të lartë mes dy vendeve, restorantet janë gjithnjë plotë me italianë. Shumë vinë thjesht për kuriozitet, por janë edhe plot paragjykime. Por, pasi mbërrijnë këtu, mbeten të habitur dhe pozitivë. Madje kanë filluar të vijnë edhe pensionistët pasi niveli i jetesës është i ulët”, thotë Luigi Nidito, zëvendës president i Dhomës së Tregëtisë Italiane në Shqipëri.

Por, janë edhe studentët e mjeksisë, ata që nuk arritën të kalojnë provimet e vitit të parë dhe që nuk duan të humbasin kohë, regjistrohen tek Universiteti i Zonjës së Këshillit të Mirë në Tiranë, e lidhur me universitete italiane, mes të cilave edhe Tor Vergata i Romës, ku shumica e pedagogëve janë italianë.

Vitet 60

Kemi edhe punëtorët italianë, që vijnë në Shqipëri për arsye të ndryshme, disa për shkak të krizës, disa për afeksion pasi shumë kanë një bashkëshort ose një bashkshorte shqiptare, ose edhe për simpati ndaj një vendi që sipas shumë personave i ngjan italisë së viteve 60. “Shqiptarët në këto momente janë më optimistë se italianët, sikurse ju në vitet 60. Sigurisht që ka probleme, por nuk ekziston kriza psikologjike. Ndërsa PBB-ja rritet”, thotë ambasadori shqiptar Neritan Ceka.

Për vitin 2014 Fondi Monetar Ndërkombëtar parashikon vështirësi në tregun italian, por vlerëson një rritje prej dy për qind. Madje ambasadori shton se “nuk ka burokraci, mund të hapësh një biznes brenda ditës pa ndonjë limitim në veçanti”. Për më tepër Shqipëria kërkon të hyjë në BE dhe pikërisht dje festoi vlerësimin e Brukselit. Një klimë, sado e vogël, shumë ndryshe nga ajo që rrethon kryeqytetet e tjera të Bashkimit Evropian.

*Marrë nga ATSH