Maqedoni, miratohet qeveria

Në Maqedoni, parlamenti miratoi të enjten kabinetin e ri qeveritar, i cili do të drejtohet nga kryeministri Nikolla Gruevski. 77 deputetë votuan për qeverinë e re, ndërsa 6 deputetë të Partisë Demokratike Shqiptare ishin kundër.Opozita maqedonase, e cila po vazhdon ta bojkotojë Parlamentin, nuk mori pjesë në seancën e sotme, por pritet që ajo t’i zbusë qëndrimet.  Të premten pritet të ketë një takim midis kryetarit të VMRO, Nikolla Gruevskit  dhe kryetarit të LSDM,  Zoran Zaevit.Zoti Gruevski gjatë një fjalimi, theksoi nevojën për një sërë reformash. Rritja ekonomike, punësimi, integrimi në Bashkimin Evropian dhe në Nato, lufta kundër kriminalitetit, marrëdhëniet e mira ndëretnike dhe reformat në fushën e arsimit, janë disa nga përparësitë e qeverisë së tij.

Në sallën e Parlamentit munguan deputetët e opozitës maqedonase përveç Roza Topuzovkas e cila nuk i është bindur urdhërave të drejtuesve opozitarë për bojkotimin e punimeve të Parlamentit.

Deputetët e Partisë Demokratike Shqiptare votuan  kundër qeverisë, duke thënë se ajo nuk ka ndryshuar dhe është bërë shkas për bllokimin e proceseve integruese të vendit, si dhe për shkak të pozitës së vështirë të shqiptarëve në Maqedoni, siç u shpreh deputeti Orhan Ibrahimi.

Dy partitë e koalicionit, VMRO dhe BDI kanë 79 deputetë, në parlamentin prej 123 vendesh.

Në radhët e VMRO-së nuk ka shumë ndryshime për sa i përket emrave të kandidatëve për ministra, përveç Zoran Jolevskit, ish-ambasador deri para pak ditësh në Uashington, i cili do ta drejtojë Ministrinë e Mbrojtjes.

Ndërkohë, tek BDI-ja ka më tepër emra të rinj në qeveri.  Adnan Jashari do të jetë ministër i ri i Drejtësisë, Bekim Neziri i Ekonomisë, Lirim Shabani i  Vetadministrimit Lokal dhe Nurhan Izairi ministër i Ambientit.  Ndërkohë, Abdilhaqim Ademi do të drejtojë Ministrinë e Arsimit; Musa Xhaferi vazhdon të jetë zëvendës-kryeministër, i ngarkuar me zbatimin e Marrëveshjes së Ohrit, ndërsa Fatmir Besimi për Integrimet Evropiane. Visar Fida nga radhët e BDI-së do të jetë ministër pa portofol. / Zeri i Amerikes