Berisha, ti je palo burrë!

Tani që ke ikur nga kolltuku i kryeplakut të këtij katundi, ti e di se ende do flasin për ty dhe kjo ndoshta për disa momente të bënë të ndihesh mirë. Do flasin nëpër studio ca analistë të lajthitur, të cilët kujtojnë se janë duke thënë ndonjë gjë madhe, kur deklarojnë se ti tani e ke siguruar vendin në histori. Por kur janë duke thënë këtë “zbulim” të tyre, ata harrojnë të thonë se si do që të vijnë punët, prapë do thuhet se kryeministër ka qenë edhe Toptani, edhe Vrioni, edhe Zogu, edhe Vërlaci, edhe Kruja, edhe Kota, etj, e bashkë me ta dhe ti. Ti e di se kohë pas kohe, do të ketë edhe vajtojca që do të lëshojnë klithma ulërime që të mos ikësh. E di se kohë mbas kohë, do të ketë dhe gurmaze gjysmë të dehura që nëpër mejhane do të këndojnë për ty, “…o babë ktheu…”, si dikur i luteshin një “babe” tjetër. I di të gjitha këto, sepse kështu ka ndodhur, e ndoshta kështu do të ndodhë edhe në vijim në katundin tonë të përbashkët. Por sërish, nuk kënaqesh me këtë prezencë. Ti do që të jesh ndryshe nga ata që kanë ikur. Nuk do që të quhesh kurrë “i ikur” dhe kjo është arsyeja që rikthehesh në formën më të keqe të mundshme. Nuk duron dot që të mos flitet për ty, në çdo çast. Nuk duron dot të anashkalohesh, edhe pse të anashkalohesh është fare normale për moshën që ke. Nëse ne nuk dimë se çfarë do të thotë e nesërmja për ty, në atë radhë të gjatë kryeministrash, ajo që mund të themi me siguri të plotë është fakti se në këto rikthimesh, ti rikthehesh, thjesht si palo burrë. Qëndro si të duash nesër në histori, madje që në gjallje porositë po deshe dhe ndonjë përmendore të ta ngrenë vite më vonë, aty në krah, ku plumbat morën jetën e katër vetëve, por këto rikthime në zgrip të jetës, janë sinqerisht rikthime të një palo burri. Kjo ndodhë sepse nuk rikthehesh si ish kryeministër, si ish drejtuesi i një partie, por si të jesh në një mejhane katundi, rivjen në skenë me anën më të keqe të personalitetin tënd. Kjo ndodhë sepse ti vjen si një plak i inatosur, i mbushur me mllefe.

Seanca e fundit parlamentare, ishte shfaqja jote më fatkeqe, ishte caku që nuk duhet ta kaloje, edhe pse më parë e ke kaluar sa herë ke dashur. Nuk duhet ta bëje atë hap që bëre dhe këtë e them sinqerisht. Lojërat e fjalëve që the më pas, se “unë e thash se e tha ai, se nuk mund të heshtë kur dikush fletë me atë gjuhë”, etj, jo vetëm që e bëjnë më qesharak pozitën tënde, por tregojnë se ligësia shkon edhe më tej se kaq, ku ti mundohesh t’i tërheqësh të gjithë pas vetes. Ti je tipik banorë i zgafelleve nga vijmë ne, ku më së shumti ekziston mendimi se nëse do ta fyesh një burrë, thuaji se e ka gruan kurvë, sepse për ty nuk eksiton gruaja si qenie në vete, por vetëm si gruaja e dikujt. Ti për të fyer një burrë, nuk e ke problem që mbi gruan e tij të hedhësh baltë pa hesap, vetëm e vetëm se ajo është gruaja e atij që vë në shënjestër të sharjeve banale. Por bënë dy herë gabim duke vepruar në këtë mënyrë.

Ti i vërsulesh Erion Velisë, i cili është më i ri se mosha e fëmijëve të tu, edhe pse e di se nuk ka asnjë mëkat. Mëkati i tij është fakti se ai, duke u rritur jetim, nuk pati fatin të ketë një baba që t’ia shtronte rrugën nga do të ecte. Mëkati i tij është fakti se ai nuk trashëgoi nga ati i tij, asnjë pasuri. Mëkati i tij është se rrugën e tij ai e çau vet, larg baltës, ndërsa sa u fut në vathën e politikës, atje ku ti je usta, i hedhë baltë pa hesap. Mëkati i tij është se ai ka ngritur familjen e tij, duke mos e llogaritur se kjo familje nesër do jetë preja e radhës së një gjuhe, për të cilën duhet të ndihesh me turp. Mëkati i tij është se është ulur në një karrige qeveritari, sepse ti ke konceptin se në çdo karrige duhet të jesh i ulur vetëm ti.

Po gabimi yt më i madh shkon më tej. Ti gjoja “e merr në mbrojtje”, duke e “prekur në sedër”, dhe stërkalat e baltës tënde shkojnë tej tij, duke mos kursyer asnjë. Nuk ke asnjë të drejtë t’i bësh të skuqen pa lidhje, gratë, vajzat, motrat, nënat, vetëm e vetëm se dikush që ka lidhje me to, është në stanin e politikës shqiptare. Nuk ke asnjë të drejtë që pa lidhje, ato të skuqen nesër para fëmijëve të tyre, kur ata dëgjojnë se dikush u thotë, “kurva”.

Je i vetmi, fatkeqësisht i vetmi, (apo dhe fatmirësisht) që risjellë gra pa fund në podiume, mes baltës, sepse ti je rob i një koncepti që gjysmën e botës, madje pjesën më të bukur të saj, nuk e shikon si të barabartë me gjysmën tjetër.

Je i vetmi që ke përmendur, jo një grua “kurvë, por “kurva” pa fund, faji i të cilave është se janë ose kundër teje, ose thjesht pjesëtare të familjeve të burrave që nuk mendojnë si ti. Ti nuk kursen asnjë në këtë vorbull balte. Nuk kurseve as zyrtare të larta, siç ishte ish kryeprokurorja, “faji” i të cilës ishte se nuk tha ato që doje ti në 21 Janar. Nuk kurseve as shkrimtaren Elvira Dones, “faji” i të cilës është se ajo në një moment të caktuar ndjeu dhimbje, kur dikush në pranin tënde, foli me përçmim për femrat e këtij vendi. Nuk kursen asnjë femër, sepse thjesht ti ke konceptin se ato, nuk janë vetë ato, por thjesht janë “kurvat” e dikujt. Ti ke konceptin se burrat janë më shumë se kaq. Sipas teje ata janë ose “burra”, ose ‘burra kurvash”. Ke konceptin se ata janë roje të nderit të grave që kanë lidhje me ta, sepse vet gratë nuk kanë moral dhe fyerja për burrat, është kur nuk e ruajnë si duhet këtë nder. Sipas teje, një grua jo thjesht nuk ka moral vet, por këtë moral e ka në raport me këta burra. Dhe kështu i fyen dyfish ato.

Por në këtë baltosje nuk kursen as ato zonja që ke në krah, të cilat nuk flasin kur ti quan “kurvë” apo “burri i kurvës”, dikë nga ana tjetër. Nuk flasin, sepse ato e dinë se nëse dalin kundër teje, një ditë po në gojën tënde, nuk do të jenë gjë tjetër, veçse “kurva”. Më tej akoma, ti e di si funksionon morali tek ne. E di se ato gra, duke qenë fisnike më shumë se sa duhet, ndodhë që shpesh herë nuk fyhen aq shumë nëse dikush i quan thjesht “kurva”, po më shumë ato vriten kur dikush i quan, “kurva” e dikujt. Ti e di këtë dhe prandaj i godet pa mëshirë në këtë pikë të tyre, kaq fisnike.

Ti nuk kursen as burrat që ke në krah. Ata nuk flasin, kur dëgjojnë nga goja jote se ata që janë në anën tjetër janë burra, vëllezër, apo bijë “kurvash”, sepse e dinë shumë mirë se po folën, edhe ata një ditë, nuk do të jenë gjë tjetër veçse burra, vëllezër, apo bijë “kurvash”.

Ti duhet të dalësh nga kjo baltë, duke e kuptuar se je duke lënduar sa e sa femra, të cilat nuk të kanë asnjë borxh.

Duhet të dalësh nga kjo gjuhë balte ku ke rënë dhe merru me burra, sepse në fund të fundit, duhet ta kuptosh se kurvat më të mëdha të këtij vendi, nuk janë ato që ti i quan “kurva”. “Kurvat” e vërteta, janë një sërë e pafund politikanësh që nuk kanë asnjë lloji morali, pjesë e së cilës je dhe ti.