Rafting kryeministror (FOTO)

Kryeministri Edi Rama ishte i ftuari i radhës i kryetarit të Kuvendit, Ilir Meta, i cili po krijon një traditë të promovimit të turizmit malor në një nga bukuritë e rralla të natyrës shqiptare.

Sot ai ka ftuar aty kryeministrin Edi Rama, i cili duket se është impresionuar shumë dhe ka postuar në Twitter fotot e uikendit në kanione.

“Kanionet e Skraparit, një eksperiencë e re e Shqipërisë magjike nga një kënd që s’e kemi parë kurrë! Mos e humbisni:-)

Fotot s’e tregojnë dot kurrë madhështinë e këtij tuneli natyror parahistorik nën qiell të hapur! Vizitojeni e do besoni.

Faleminderit skuadrës së Zamos e Blerinës që na shoqëruan në udhëtimin fantastik dhe Ilirit që na bëri këtë surprizë.

Zamo, emigranti që u kthye 10 vjet më parë nga Italia për t’i bërë kanionet të famshme e sot pret turistë që shtohen,” shkruan Rama.

Pas këtij eventi, sekretarja e Përgjithshme e Federatës shqiptare të Rafting, Blerina Ago ka theksuar rëndësinë e hartimit dhe implementimit të një plani zhvillimi, në përputhje të plotë në mbrojtjen e mjedisit dhe ruajtjes së natyrës. “ Në mënyrë që Shqipëria të jetë konkurruese në rajon në çdo produkt/ shërbim turistik që do të ofrohet dhe çdo investim që synohet të realizohet duhet të kryhet sipas standardeve ndërkombëtare, ” tha Ago.