Reforma territoriale, vendorët: Mazhoranca të na dëgjojë dhe ne

Reforma territoriale do të jetë pjesë e disa tryezave të shoqatave të të zgjedhurve vendor, ku konkretisht sot stratoi debate mbi një çështje të tillë. “Zgjerimi i autonomisë vendore, reformë e qëndrueshme territoriale”, ishte tema e tryezës që u organizua sot, ku morën pjesë kryetarë komunash e bashkish, ekspertë dhe grupe interesi. Në qendër të këtij diskutimi është pikërisht kërkesa e përfaqësuesve vendorë për një konsulencë të gjerë për reformën territoriale. Në vlerësimin e tyre, rritja e autonomisë dhe decentralizimi janë më të rëndësishme se sa kufijtë dhe hartat.
Nga ana e tij, kreu i Bashkisë së Tiranës, Lulzim Basha e cilësoi skemën e propozuar nga mazhoranca si një ndarje territoriale të njëjtë me atë të Enver Hoxhës.
“Kjo skemë nuk do të funksionojë për qytetarët, nuk është e qëndrueshme dhe nuk kursen para. Përkundrazi do të hajë më shumë parë, e kjo jo për t’i kthyer në investime. Qytetarët nuk e gjejnë veten te kjo ndarje. Qeveria e zotit Rama dhe Meta i është nisur detit më këmbë, do të dalë tek modeli me 36 njësi, modeli Enver Hoxha.
Ndaj le ta ndalim sa nuk është vonë, le ta ndalim me forcën e arsyes. Ta konsiderojmë këtë seminar dhe dy konferencat si thirrje të arsyes për këdo që është me të vërtetë i intersuar për këtë proces. Nëse thirrja e arsyes nuk funksionon ne të zgjedhurit vendorë nuk do të rrimë duarkryq e të heshtur. I bëjmë thirrje qeverisë t’i përgjigjet thirrjes së arsyes të ulet të dialogojë me ne përfaqësuesit e pushteteve vendore, në të kundër me Kushtetutë do të dalim në rrugë”, deklaroi Basha.