Një vit në qeveri, Rama para deputetëve: Pas Lazaratit, radha e sistemit të drejtësisë

Kryeministri, Edi Rama u shfaq sot përpara ligjvënësve socialiste me jo pak arritje në këtë vit të parë në qeverisje, ku natyrisht, sipas tij, rezultati në Lazarat, i dha një imazh tjetër vendit.  Por krahas këtij moment, me rëndësi për kreun e mazhorancës është reforma në drejtësi.

“Brenda dhe jashtë vendit ka jehuar fort fitorja e shumëpritur, por e pashpresuar nga shumëkush, fitorja e shtetit me krimin në Lazarat. S’ka asnjë dyshim se lufta me krimin ka qenë dhe mbetet një prioritet themelor. Një prioritet që siç e dimë të gjithë ka qenë tejet i mundimshëm në këtë pjesë hyrëse të qeverisjes për shkak të gjendjes katastrofike ku e gjetëm Policinë e Shtetit. Në këtë 23 qershor, pa u mbushur 300 ditë, përmbushëm angazhimin për ta kthyer Policinë e Shtetit në krye të detyrës”, vuri në dukje Rama.

Por përmes këtyre vlerësimeve, do t’i jepte përgjigje dhe pretendimeve për shkarkimin e një prfaqësuesit të kabinetit “Rama”.

“Saimir Tahiri sot meriton jo vetëm falënderimin tonë të megjithë zemër për vlerën e shtuar që i ka sjellë qeverisjes dhe familjes tonë politike. Meriton edhe ndjesën e heshtur ndaj çdo deputeti që nuk e ka bërë si duhet ndaj tij detyrën e deputetit. Në kushtet ku i ka rënë për pjesë të punojë i duhet të përballet me situata tejet të rënda. Në këtë 23 qershor të parë të qeverisjes sonë ëndrrat dhe shpresat e rilindjes 2013 jo vetëm nuk janë fikur, por janë forcuar fale punëve të mira dhe rezultatet e prekshme dhe rezultatet në Lazarat jaë “qershia mbi tortë””, nënvizoi ai.

Gjithashtu, në fjalën e tij para deputetëve socialistë, Rama foli dhe për një opozitë në aleance me krimin, për gjyqtarë pjesmarres në vrasje dhe për “Gate” të përfshirë në pazare me prokurorinë. Sipas tij, me kete sistem drejtësie, Europen nuk e shohim “as me dylbi”.

Për këtë arsye, kërkoi nga deputetët e Komisionit parlamentar të Ligjeve të nisin diskutimet për reformën në drejtësi.