Droga e kapur shkon në 65 tonë, 47 të arrestuar  

Shkon në 65 ton drogë sasia e kapur dhe djegur në Lazarat nga Policia e Shtetit. Dje u kapën mbi gjysmë toni i fshehur në një tunel si dhe sasi armatimi dhe maska. U ndaluan dy persona të dyshuar, duke e çuar në 47 numrin e tyre.

 

Sekuestrimet dje

Në një tunel në periferi të fshatit, gjatë kontrollit të ambienteve ditën e djeshme, u zbuluan edhe 42 thase me 650 kg marijuanë. Lënda narkotike u gjet në banesën e të dyshuarit Ajet Kazma, 50 vjeç, i cili është arrestuar në flagrancë për veprën penale “prodhim dhe shitje të narkotikëve”. Gjithashtu gjatë operacionit u sekuestruan 3 armë zjarri automatike, 1 arme zjarri me kalibër 5,5 milimetra, 620 fishekë, 15 granata dore dhe 3 maska. Gjithsej janë kontrolluar 12 banesa dhe territore në fshatin Lazarat, duke e çuar numrin e shtëpive në 850. Gjithashtu po mëngjesin e djeshëm, policia arriti të arrestonte një tjetër person të shpallur në kërkim, Edmond Boçia, 47 vjeç, të cilit në banesë i ishin gjetur 1 mitraloz i lehtë, një “Kallashnikov”, 550 fishekë dhe një sasi lënde narkotike.

 

Operacioni në total

Gjatë operacionit që ka nisur prej mesit të muajit qershor, policia ka arritur që në Lazarat të sekuestrojë dhe djeg mbi 65 tonë drogë marijuanë dhe hashash, si dhe 134 mijë bimë narkotike fidanë të mbjellë. Po kështu janë sekuestruar 5 kg heroinë, 21 kg hashash çokollatë, 17 litra vaj hashashi, 5 kg farë kanabisi. Policia ka zbuluar edhe 5 laboratorë të ndryshëm, pajisje për tharje dhe presim. Gjithashtu janë gjetur mbi 400 armë të ndryshme, pistoleta, snajpera, rreth 30 mitralozë, qindra granata, mbi 1168 kallëpe tritoli, 19 mina kundër këmbësorisë dhe mijëra fishekë. Nuk kanë munguar as kamerat termike, dylbitë, maskat, jelekët antiplumb, uniformat e policisë, dokumente të ndryshme identifikimi, deri në ato serbe, pajisje për kërkim floriri dhe metali. Gjithashtu janë kapur makina me drogë, apo sekuestruar mbi 20 mjete të tjera transporti. Një pjesë e armëve dhe mjeteve e drogës u gjetën të djegura për të humbur gjurmët.

 

Sekuestrimet në total:

65,08 tonë drogë

134 mijë rrënjë kanabis

850 shtëpi të kontrolluara

47 persona të arrestuar

5 kg drogë heroinë

21,7 kg hashash çokollatë

4,4 kg farë kanabis sativa

16,8 litra vaj hashashi

5 laboratorë

408 armë zjarri, automatikë, pushkë, pistoleta

2 snajpera

1 mitraloz kundërajror

28 mitralozë të lehtë

4 antitanke

4 murtaja, 6 granatahedhës

29 armë gjahu

45 armë të djegura

227089 fishekë të ndryshëm

1168 kallëpe tritoli

733 granata

361 predha granatahedhësi e murtaje

19 mina kundër këmbësorisë

3924 kapsolla detonatore

1284 ml fitil zjarrpërcjellës

11 mjete me armë e kanabis

17 automjete të tjera

4 mjete të djegur

37 targa automjetesh

1 aparat kërkues floriri, 5 kasaforta

Dokumente identitetesh të  ndryshme

Uniforma policie dhe maska

5 kamera vëzhgimi

7 maska, 1 jelek antiplumb

2 palë doreza, 1 dylbi termike,

1 dylbi optik, 1 dylbi nate, 1 dylbi i djegur

26,6 milionë lekë të vjetra