Për paradën e maskarenjve

Vargje të nënshkruara

Nexhip Bashllari

Ka e çfarë nuk ka kjo botë,

Ka të mirë e ka të liq,

Ka të ditur e të ngrohtë,

Zemërngrirë e mend eksiq.

Duan që t’u servilosesh

Dhe t’u thuash: hej, çfarë burri!

Dhe për vete të krekosen

Kur në dorë u ka mbirë huri

Jo pak duan t’i lëvdosh

Dhe t’i bësh heronj pa qenë,

Për të metat, pak t’i shposh,

Erzin ta marrin ndër këmbë

Mbahen si më të mëdhenjtë,

Baballarë, mendje-florir

Por vetë blihen si plaçk’ tregu,

Disa shtrenjtë, disa më lirë

Ka prej tyre jetë e mot

Që shurrën hedhin përpjetë,

Të ngopur nuk ndenjkan dot

Dhe të etur mot e jetë.

Ka prej tyre sa të tjerë

Të zhytur në mizori,

Në vend të ndihen të dhjerë,

Mprehin dhëmbët përsëri.

Ka, ore, ka ndonjë të marrë,

Që na bën dhe politikën,

Pas karriges hiqet zvarrë,

Të vret natën, të qan ditën.