Djali i Nishanit diplomohet

Ersi Nishani është djali i Presidentit të Republikës, Bujar Nishani. Ai vazhdon studimet në Vjenë të Austrisë dhe për këtë arsye duket shumë pak në rrugët e Tiranës. Megjithatë, nga profili i tij zyrtar në rrjetin social zbuluam se ai është… diplomuar. Në ceremoninë e diplomimit ka qenë i pranishëm edhe babai i tij, këtë e vërtetojmë nga Facebook-u i djaloshit, i cili ka postuar një foto së bashku me të atin, në mbrëmjen e ndarjes së diplomave.

Më herët, i pyetur se përse ka zgjedhur Vjenën për studimet, ai është shprehur: “Kisha gjithmonë dëshirë që një pjesë të arsimit tim ta bëja në Vjenë, por fatmirësisht kam pasur edhe mbështetjen maksimale të prindërve. Për sa i përket arsyes se pse e zgjodha, mund të them vetëm një gjë: Vjena është qytet, i cili i përmbush të gjitha kushtet dhe cilësitë që i nevojiten një njeriu”. Kjo ishte diploma e shkollës së mesme për Ersin. Gjatë daljeve të tij në media kemi mësuar se 19-vjeçarit i pëlqen të studiojë për mjekësi, kjo e argumentuar me faktin se Austria ka shkolla të mira për këtë degë. Kështu që, shtatorin që vjen mund ta shohim Nishanin e ri, pjesë të universiteteve më të mira austriake si student i mjekësisë.