SHËNIM: Opinioni publik, mes Kopit dhe Llazit

Opozita duket se ka gjetur një metodë shumë të efektshme në strategjinë e saj të luftës politike. Ajo është “metoda Kopi”. Kopi është ai personazhi gjysëm komik në filmin ‘Rrethimi i vogël’, që luan rolin e një veterani komunist të devotshëm. Mban gjithnjë me vehte një bllok ku shënon çdo gjë që i kap veshi e syri, për t`ia servirur partisë në emër të idealit komunist.

Një tip hafije pra, që e ka ndërtuar mitin e njeriut heroik përsëgjalli, mbi pretendimin se njëherë e një kohë, ka ndjekur diversantët. Dhe kur një ditë shkon të takojë kryetarin në zyrën e tij, për t`iu ankuar për të nipin që ende e mbajnë të emëruar në malësi, sheh të futet tek ai Llazi, një i sapoliruar nga burgu për shkak të një dënimi që kishte të bënte me rrahje. Duke e konsideruar rrahjen një akt të rëndë për shoqërinë, Kopi e denoncon Llazin tek kryetari, që nga ana e tij nuk ndikohet fare nga spiunimi prej të devotshmi të Kopit, duke ia kthyer me këto fjalë: “Për gabimin që bëri, ai e kreu dënimin dhe në burg ka mbajtur një qëndrim shumë të mirë”.

Tani, që opozita është përfshirë nga sindromi i Kopit, që për koiçidencë luhet po nga Albert Vërria, që luan dhe Nuri beun e ‘Koncert në vitin 36’, të ngjashmin e Saliut në opozitë si plak gërrnjar, kjo po shihet në denoncimin e sa e sa të njollosurve penalisht; por që dhe shoqëria shqiptare është e mbushur përplot “Llazër”, kjo po dihet. Çështja shtrohet nëse ka vlerë fakti që, ndokush prej të denoncuarve ta ketë shlyer veten e të ketë të drejtë të rifillojë jetën me të gjithë pretendimet e të drejtat e mundshme, siç Llazi donte të rikthehej në punë?! Pra, mes Kopit dhe Llazit, nga duhet të endet gjykimi i opinionit?! Ndërkohë, që PD është edhe ‘Kop’ edhe ‘Llaz’, pasi ndërkohë që denoncon pa pushim, lidershpi i kësaj partie ka mbi shpinë jo thjesht rrahje, por dhe vrasje! / E.H.