I nderuar lexues! Komisia Letrare Shqipe ishte një komision gjuhëtarësh e mendimtarësh që u krijua në Shkodër më 1916 me nismën e Luigj Gurakuqit. Kishte si qëllim të çonte më tej zgjidhjen e problemeve të gjuhës letrare shqipe pas Kongresit të Manastirit dhe të zhvillonte letërsinë shqiptare. Për të ndihmuar në krijimin e një gjuhe letrare të përbashkët duke afruar sa më shumë të dy variantet, Komisia Letrare Shqipe vlerësoi variantin letrar të mesëm si urë në mes të toskërishtes e të gegërishtes dhe dha një ndihmesë të rëndësishme për të përpunuar një drejtshkrim që e çoi më tej njësimin e shqipes së shkruar. Ajo caktoi gjithashtu rreth 500 terma për administratën shtetërore e për gjyqet.