SHËNIM: Ç’fshihen pas këtyre xhamave?!

Vitet e tranzicionit shqiptar, janë padyshim vite kaosi e çartafillosjeje të përgjithshme, individuale, familjare e shoqërore, shoqëruar me ndryshime të befta fatesh e rangjesh; që të gjitha, pasojë e prishjes së ekuilibrave sociale në përmasa ekstreme. Demokracia vërtet është një sistem që u jep shansin të gjithëve ta shpërfaqin veten në aftësi, në bazë të punës, përpjekjeve dhe sakrificës, por këto parime bazë, ne të gjithë e dimë se nuk kanë funksionuar.

Për këtë arsye, kemi brekëgrisur të bërë zengjinë brenda një kohe të shkurtër dhe e anasjelltas. Shumë elementë dhe detaje mund të merren si shembuj për ta konfirmuar këtë, për të shërbyer si një panoramë e absurdit të shoqërisë sonë, ku asgjë nuk është në vendin që i takon dhe ku duhet të jetë, por njëra prej tyre, lehtësisht e rrokshme, është mospërputhja e standardit të lartë të një makine, pamjes së saj luksoze, me portretin e atij që është në timon.

Sa më pompoze makina, në përmasë, dizajn e luks, aq më i pahonepsshëm drejtuesi i saj, me tipare ku i lexohet qartë një e kaluar e mjerë, por që demokracia ‘made in Albania’, i ka dhënë shansin që dhimbjen ta kthejë në forcë, dhe ashtu, forcërisht, brutalisht e paturpsisht, ka arritur në pikën e imponimit nëpërmjet një afirmimi individual frikëndjellës. Të vetmet çaste paqeje që ofrojnë, janë ato në pritje të jeshiles së semaforit (nëse vendosin ta respektojnë), ku me gishtat e dorës së djathtë (meqë zakonisht, automjetet e poseduara janë me kamio automatike), kruajnë hundët, duke bërë kalime sa në të djathtën aq dhe në të majtën vrimë.

Dhe nëse ndodh ta kontrollojë policia, në automjet mund të gjindet fare mirë një shkop (levë) bejzbolli (jo për bejzboll, sigurisht), por kurrsesi ndonjë pako facoletë./ E.H.