Paloka: Në Shqipëri po krijohet një sistem i ri diktatorial

Kontestimi i projektligjeve të sjella në Komisionet Parlamentare nga vetë përfaqësuesit e mazhorancës, për kreun e Grupit Kuvendor Demokrat, më shumë se tregues i cilësisë së dobët të ligjeve, është një strategji e ndërtuar nga kryeministri.

“Përsa i përket skenave të ndodhura në komisionet parlamentare, kam frikë se mos janë pjesë e shout të Ramës, i cili mendon t’i thotë shqiptarëve, se pavarësisht se opozita nuk është në parlament, ne mund të bëjmë opozitën vetë”, thotë ai për Klan.

Sa i takon qëndrimit të deputetëve të Lëvizjes Socialiste për Integrim, që në shumë raste kanë kundërshtuar me forcë formën, por dhe përmbajtjen e projektligjeve, Paloka thotë se është rrjedhojë e prekjes së interesave private:

“Unë mendoj që është pjesë e strategjisë, por përsa i përket LSI-së mendoj se aty përplasen edhe interesat. Ka interesa grupesh, interesa individësh që përplasen brenda asaj mazhorance”.

Edhe pse kanë vendosur një marrëdhenie bojkoti pa afat me parlamentin, Paloka thotë se opozita do të përdor çdo mjet për të kundërshtuar projektligjet që prekin interesin publik:

“Abosulisht ne do të kemi reagimet tona për çdo projektligj që do të tentohet të kalohet në Parlament. Për më tepër që kemi të bëjmë me projektligje që jo vetëm janë aprofesionale, por pothuasje të gjithë me shkelje kushtetuese, me shkelje të të drejtave të njeriut dhe me synime të qarta për vendosjen e një regjimi, pse jo diktatorial në Shqipëri”./b.l