Topi: PD, një opozitë inatçore dhe megalomane, që është peng i Berishës

Ish-presidenti Bamir Topi, e ka cilësuar Partinë Demokratike, si një parti inatçore dhe megalomane.

Sipas tij, ajo është marrë peng nga Sali Berisha.

Topi thotë se të gjithë në PD janë punonjës me mëditje për Berishën.

“Situata apo ndjeshmëritë në partinë, që sot de jure e drejton z. Basha, tek unë personalisht përcillen me indiferencë pasi prej kohësh jam shprehur dhe kam parashikuar, që ai formacion politik nuk është më në funksion të demokracisë në Shqipëri.

Tashmë, e dinë dhe e kuptojnë të gjithë se strukturat politike dhe grupi i saj parlamentar qëndrojnë dhe punojnë si punëtorë me mëditje në “pronën” e Sali Berishës.

Janë zgjedhur dhe kanë qenë interpretë mekanikë të kësaj filozofie, që e çoi atë parti, drejt precipitimit në një disfatë elektorale, nga e cila nuk duket se ekziston rrugëdalje.

Kjo opozitë inaçore dhe megallomane, jo vetëm që e ka ulur dukshëm performancën në Parlament, por vazhdon të mos ketë asnjë vizion për rikthimin e së djathtës në pushtet.

Shifrat flasin qartë, për më tepër, që protagonizmi në vazhdim i humbësit të madh vazhdon të shtojë rrjedhjen e mëtejshme nga elektorati, që e ka mbështetur tradicionalisht.

Përpara se të ëndërrohet rikthimi në pushtet, e djathta në Shqipëri ka nevojë të çlirohet nga pengmarrjet dhe të futet në rrugën e bashkëpunimit, përndryshe, do të kemi një dominim të gjatë të së majtës në Shqipëri”, thotë ai në një intervistë për revistën Java.

Topi ka ripërsëritur ndërkohë akuzat për Kuvendin e ri.

Sipas tij, aty ka vrasës, njerëz me problem me ligjin, por dhe me problem mendore.

“Aty gjen deputetë pa shkollë, e me nivel kulturor mediokër, vrasës, të dezekuilibruar mendërisht; njerëz që kanë patur problem me drejtësinë, njerëz vulgarë në komunikim.

Ndjej dëshpërim për situatën në institucionin më të lartë përfaqësues, ku bëhet debati politik, ligjet, emërimet dhe kontrolli kushtetues mbi institucionet e shtetit.

Natyrisht problemet e vjetra kanë krijuar një shtrat kronik, që riaktivizohen në mënyrë frekuente, edhe për arsye se disa protagonistë të politikës së keqe, janë aty dhe turbullojnë herë pas here ujrat”, thotë ai./b.l