SHËNIM: A mund të imagjinohet ndryshe ky vend?!

Ne nuk mund të imagjinojmë që politikanët tanë të ishin engjëj; që në shtet të kishte të pakorruptuar, që Shqipëri çdo punë të bëhej me moralin, inteligjencën dhe vizionin më të lartë; jo! Këto konsiderohen ëndrra në diell e në hënë bashkë, në këtë vend. Por gjithsesi,  kemi të drejtë të imagjinojmë se vija bregdetare e Durrësit, sidomos segmenti Ura e Dajlanit – Iliria, ka patur plot shanse për të mos qenë ai që ka përfunduar së qëni pas vitesh ndërtime prej të panginjurish. Tashmë që është sezon plazhi, është më therrëse ajo që ka ndodhur aty, ku ndërtimet atje ku nuk duhet, në distancën mes rrugës dhe rërës së plazhit, ja kanë hequr çdo bukuri e kuptimësi asaj pasurie të natyrës. Sheh ngado ndërtime, njërën më pak të hijshme se tjetra, ose variacione shëmtish arkitekturore ngjitaz më njëra-tjetrën, ndërsa detin duhet ta gjesh me të pyetur, se atë gjëkundi nuk e sheh. Deti nuk është vetëm për ato që lahen, por dhe për ato që tresin vështrimin aty. Këta të dytët, nuk kanë vend në Durrës.

Le ta imagjinojmë pra se Durrësi mund të ishte farë mirë ndryshe.

Do kishte ndoshta probleme dhe abuzime në planimetri urbane, do kishte tolerime në lejimin e ndërtimeve me stil të shëmtuar arkitektonik, por jo që të ndërtohej aty ku fare mirë të ishin ato hapësira të gjelbërta ekzistuese, me parqe, terrene argëtuese, ambjente shplodhëse e det për të gjithë, për t`u larë e për t`u parë. Drama e këtij vendi, sidomos në tranzicion, është se imagjinatën mund të përdorësh, por asesi për gjëra të bukura. Ndërsa për të shëmtuarën dhe skandalozen, ajo mund të jetë gjithnjë shpërthyese!/ E.H.