Naço: Lufta kundër korrupsionit do të nisë nga gjyqësori

Lufta ndaj korrupsionit do të nisë nga sistemi gjyqësor. Kështu u shpreh në analizën e 300 ditëve të para, ministri i Drejtësisë, Nasip Naço.

“Lufta kundër korrupsionit do të ketë në fokusin e saj ndërgjegjësimin e opinionit publik në luftën ndaj korrupsionit gjyqësor, parandalimin e korrupsionit duke reformuar e modernizuar të gjithë sistemin e drejtësisë, dekurajimin pa kompromis të këtij fenomeni nëpërmjet zbatimit të ligjit anti-mafia duke filluar me sekuestrimin e pasurive të fituara në mënyrë të paligjshme nga gjyqtarë dhe prokurorë. Është e papranueshme që aktorë kyç të sistemit të drejtësisë me veprimet apo mosveprimet e tyre e kanë kthyer veprimtarinë e institucioneve që drejtojnë në një sagë të pafundme, në një telenovelë që çdo seri e saj na surprizon me guximin e shkeljes së ligjit, mungesën e eficiencës dhe papërgjegjshmërinë e vendimmarrjes.”

Ndërsa zëvendëskryeministri Peleshi, i pranishëm në analizën e Ministrisë së Drejtësisë, tha se mungesa e besimit që qytetari ka te drejtësia është më i madh se asnjëherë.

“Gjendja ku ndodhet sistemi i drejtësisë sot është problemi ynë më i madh. Nuk është problem i qeverisë shqiptare, por i shoqërisë shqiptare. Perceptimi i qytetarëve për performancën e sistemit të drejtësisë ka prekur fundin. Të gjitha sondazhet tregojnë një mungesë të theksuar besimi te ky sistem dhe një perceptim të tij si të kapur nga korrupsioni, klientelizmi, politizimi dhe një frymë korporative”, theksoi Peleshi.