E vërteta e “dosjes” time dhe e zgjedhjes si deputet

Emri i tij është përdorur shpesh këto dy javët e fundit sidomos nga eksponentët më të lartë të Partisë Demokratike. E gjithë historia nis pas një përplasjeje që pati në Kuvend mes deputetëve Strazimiri, Ndreu dhe Ndoka. Ai ka vendosur të mos përzihet, me përjashtim të ndonjë reagimi sporadik në Facebook. Pas një heshtjeje dy javore që është shënjestruar nga opozita, Dita ka arritur të realizojë një intervistë me deputetin e Lezhës, Arben Ndoka, për të marrë versionin e tij lidhur me akuzat, sa qëndrojnë dhe sa janë trillime, pse nisi kjo valë sulmesh ndaj tij pikërisht në këtë moment, cila është lidhja e tij me Partinë Demokratike dhe cilat janë ofertat që ajo i ka bërë për ta pasur në kampin e djathtë. Pse nuk ka një përgjigje Partia Socialiste për këto akuza dhe a ka Ndoka një dosje për Sali Berishën që do të tronditë opinionin?…  

 

Zoti Ndoka, sipas deklaratave zyrtare, kryetari i Kuvendit, Ilir Meta, menjëherë pas incidentit tuaj me deputetin Strazimiri, ka dënuar aktin e dhunshëm, ndërsa Byroja e Kuvendit ka marrë masë disiplinore ndaj jush duke ju pezulluar për 7 ditë nga punimet e Kuvendit. Duke e cilësuar deputetin Strazimiri si “i pretenduar si i dhunuar” nga veprimi juaj, doni të thoni se ngjarja nuk ka ndodhur?

 

Me këtë që thashë, tregova që nuk njoh zyrtarisht këtë faktin e kallëzimit, sikurse edhe shpreha habinë mbi nevojën e kryerjes së këtij veprimi nga të tretë dhe jo nga personi që pretendon që mund të jetë i dëmtuar. Sa i përket konfliktit me deputetin Strazimiri, e pohoj që ka ndodhur dhe ju rrëfej se si të tillë nuk e kam konsideruar, për sa më takon, në përmasat e kufijtë e një akti penal të detyruar për t’u kallëzuar.

 

Kjo për faktin se në Parlament tashmë incidentet dhe batutat për rrahjen e radhës janë kthyer në normalitet, apo dhunën e ushtruar ndaj Strazimirit nuk e konsideroni vepër penale?

 

Unë udhëhiqem nga parimi i respektit maksimal ndaj çdo kolegu me të cilin ndaj punën dhe përderisa në edukimin tim e konsideroj të shenjtë fjalën, druhem e kujdesem të mos fyej, qoftë dhe verbalisht askënd. Pohimet e bëra në pyetjen tuaj, në këtë këndvështrim, e konsideroj fyerje për deputetin Strazimiri e për këtë arsye, në lidhje me këtë pyetje kufizohem me kaq fjalë përgjigje.

 

Thoni se fjalën e keni të shenjtë, ndërkohë që më lart deklaruat se jeni i habitur që kallëzimin e ka bërë PD dhe jo ai që ju e etiketoni “i pretenduari si i dëmtuar”. Pikërisht si një akt dhunimi të fjalës së opozitës e ka motivuar ngjarjen Partia Demokratike…

Gazetari është dëshmitar i kualifikuar i publikut unë e prezumoj të vërtetë, mbi këtë bazë, çka ju më treguat në pyetjen e parë, nuk kuptoj pse do të duhej të bëhej kallëzimi, pavarësisht ekzistencës së faktit, nga të tjerë deputetë të Partisë Demokratike, për më tepër nuk kanë qenë në vendngjarje. Ç’do të bënin këta deputetë, që ju përmendni si vizitorë të Prokurorisë së Përgjithshme dhe kallëzues të faktit, po qe se grindja do të ndodhte mes dy deputetëve të partisë së tyre?

 

Unë nuk di ç’do të ndodhte me PD-në, por di që opozita ka ditë që ju akuzon ju për dhunë. Kjo që ju thoni sa ju përjashton nga akuza?

Nuk besoj se funksionon kështu, nga pikëpamja ligjore e procedurale dhe për sa kohë të akuzuarit, me apo pa shkak, me apo pa fakte, me apo pa të drejtë, përbën formë jetësimi politik të opozitës së sotme e veçanërisht të kreut të saj real. Tek kam vendosur të përballem me të, jam i përgatitur të rezistoj edhe kur ky veprim i saj i drejtohet ekskluzivisht emrit tim. E thënë më shkoqur, nuk ka akuzë të opozitës, më konkretisht të PD-së, që më shqetëson apo më  tremb, për sa kohë ajo buron nga një arsye e vetme, që është pjesëmarrja ime në politikën kundërshtare me të.

 

Zoti Ndoka, ju thoni se motivi i sulmit ishte politik, ndërkohë që Partia Demokratike, prej ditësh ka publikuar një dosje penale tuajën…

Ku është sulmi politik? Unë nuk kam fshehur asnjë dhe asgjë nga e shkuara ime, në çdo kualitet që kam fituar nga pikëpamja politike, do të gjenit investimin tim shpirtëror dhe fizik, ndër vite, tek njerëzit në qytetin ku unë jetoj prej vitesh, që kur kam lindur. Nëse një e vërtetë gjyqësore e një autoriteti të huaj ndaj meje, selektohet në pjesë të saj, për t’u publikuar, përzgjedhjet në kohë nga publikuesi politik, si dhe mbartet si informacion për shkak të vjedhjes së zyrtarëve të shtetit, ku publikuesi punonte deri një vit më parë, e gjitha kjo nuk është tjetër veçse një aksion politik i ndërmarrë me qëllim tjetër, veç atij pozitiv jo. Problemi im i shkuar për të tjerët, por ju siguroj ende jo për mua, sepse nuk kam shteruar së ushtruari të drejtën time korrigjuese mbi atë që konsiderohej padrejtësi, të vuajtur personalisht dhe familjarisht. Nuk evidentohet por fryhet dhe abuzohet siç do ua provoj lehtësisht, nga shqetësimi i opozitës, pse në Parlament na qenkësh një deputet i mazhorancës me të shkuar kriminale. Kualiteti profesional, kurrsesi ai moral i disa prej individëve që ish-kryetari i opozitës de jure dhe ai de fakto i orkestron dhe i detyron të pohojnë gjithçka kundër meje, besoj se u mundëson atyre të kuptojnë të vërtetën mbi atë çka lexojnë në aktet e vjedhura në zyrat e shtetit. Fakti që nuk duan ta bëjnë këtë zbulon qëllimin e vërtetë të reagimit të tyre të vonë, njëkohësisht i bind në kotësinë e harxhimit të energjisë sqaruese të paktën ndaj tyre. Se sa politik dhe vetëm politik është qëllimi i veprimit të tyre është e shpjegueshme lehtësisht nga fakti që e shkuara ime ka qenë e  “rëndë”, e theksoj në thonjëza këtë, nuk e pengoi aspak përzgjedhjen time për të më bërë drejtor të një institucioni të rëndësishëm qendror të vendit gjatë qeverisjes së PD-së. Dhe kjo për të vërtetuar vetëm pjesën e dukshme të ofertave të PD-së, pasi ju siguroj që kanë bërë përpjekje të vazhdueshme për të më joshur në vazhdimësinë e bashkëpunimit tim me këtë forcë politike.

 

Thatë që nuk keni fshehur asgjë nga e shkuara juaj. Kryetari i Partisë Socialiste, Edi Rama, kur vendosi përfshirjen tuaj në listën e kandidimit si deputet i qarkut të Lezhës, a ishte në dijeni të kësaj të shkuare?

Së pari, më lejoni të korrigjoj pak masën e pyetjes suaj se çështja mund të jetë edhe politike. Unë po ju them që është krejtësisht politike; përmbajtja, qëllimi dhe forma e ekzekutimit të akuzës. Së dyti, po ju ripohoj që përpiqem të ndërtoj çdo raport, qoftë dhe politik mbi bazën e sinqeritetit. Për më tepër e bëj këtë gjë me njerëzit më të cilët kam detyrimin moral dhe institucional për shkak të besimit që më ofrojnë. Jetën time, në këtë këndvështrim, me çdo të mirë apo të keqe të saj, e njohin të gjithë ata që më kanë besuar dhe votuar, si duke më propozuar si deputet, ashtu dhe duke më dhënë të drejtën e  ushtrimit të këtij funksioni. Besoj që është një e shkuar e ndëshkuar ajo kohë kur njerëzit konsideroheshin me dosje. Vetëm për këtë arsye dhe frymë kredoje personale, nuk jam kundërpërgjigjur për të evidentuar, që në fillim, ironinë e faktit se violina e parë e agresionit verbal ndaj meje ka qenë i vetmi ish-gjyqtar i dënuar për korrupsion, në këto njëzet e pak vite demokraci në Shqipëri.

 

Unë e kuptoj që mes njerëzve që bashkëpunoni dhe që ju kanë përzgjedhur ka një besim të ndërsjellë, por personalisht, dhe besoj se dhe të tjerë nuk ndihen rehat kur mësojnë se në Parlament janë të ulur deputetë që janë dënuar për prostitucion, pengmarrje dhe trafik lëndësh narkotike. Të paktën prej një jave kjo është ajo që thotë Partia Demokratike, ka botuar dhe një pjesë të dosjes që ju thoni që është selektive?

Detyrohem t’ju rrëfej që nuk jam ndier, nuk kam pranuar dhe nuk kam reshtur së kërkuari të drejtën time për të mos u ndëshkuar mbi diçka që s’e kam bërë kurrë. Duke mos qenë ende një betejë e humbur, deri në përfundim të saj, po ju them që populli i Lezhës me të cilin ndaj jetën, hallet, shqetësimet dhe gëzimet prej vitesh, është sa i vogël në numër aq edhe i madh në vlera morale qytetare e patriotike. Ky popull më njeh mirë e më voton pikërisht se e di që unë jam larg të qenit antivlerave, që ndonjëherë trembeni dhe ju si gazetarë.

 

Unë nuk po kontestoj perceptimin që banorët e Lezhës kanë për ju, por ama, që kur ju keni ardhur në Parlament, jeni akuzuar dhe së fundi u bënë publike dosjet për të cilat ju akuzon PD…

Nuk janë dosje. Është një proces i vetëm me përmbajtje të rreme fajësie dhe veprimeve procedurale, për sa kohë është realizuar në mungesën time dhe më është penguar, deri më tani, rishikimi i procesit.

 

Po kuptoj se juridikisht do të jetë një beteje që ju e ndiqni, por moralisht gjykoni se për sa thuhet ju rëndon më shumë për faktin e të qenit në Parlament?

Nuk shoh asnjë problem të karakterit ligjor, po ashtu dhe moral. Mbi të dyja këto kritere, çmoj se opozita, para së gjithash duhet të filtrojë veten, si për të kuptuar që padrejtësi si kjo e imja u kanë ndodhur edhe eksponentëve të caktuar të saj, ashtu dhe për të dëshmuar vërtetësinë e qëllimeve të saj të ndershme.

 

Po më thoni se nga 19 deputetët e akuzuar nga PD-ja me të shkuar kriminale, janë edhe nga opozita?

Nuk kam numëruar këtë kategori subjektesh dhe nuk merrem, si edhe pohova më lart, me të shkuarën e njerëzve. Arrij ta kuptoj të tashmen e tyre edhe pa ndihmën e saj.

 

Që kur morët mandatin e deputetit, opozita duket se ka një strategji të targetimit për denigrimin tuaj dhe ku duket se ia ka dalë. Në gjykimin tuaj, kjo po ndodh për shkak se ju keni fituar mandatin në një zonë bastion të PD apo për shkak të kësaj dosjeje që ju thoni se është vendosur në mungesën tuaj?

Së pari, më lejoni të korrigjoj në kohë fillesën e sulmeve. Ajo ka filluar që me kandidimin tim në listën e Partisë Socialiste, të paktën për këtë pjesë të rëndësishme të veprimit tim politik si përfaqësues i PS. Partia Demokratike nëpërmjet agresionit të saj nuk ia doli, si edhe pohoni ju më lart. Votat për Partinë Socialiste në rrethin e Lezhës, gati u dyfishuan të krahasuara këto me zgjedhjet parlamentare të vitit 2009. Jam i sigurt që të njëjtin efekt bumerang do të kenë këto sulme edhe në këtë fazë të re të jetës parlamentare. Politikisht do të vazhdoj të ekzistoj e kontribuoj në pakësimin e mëtejshëm të mbështetjes politike për një subjekt shpifës keqdashës e djallëzor.

 

Ju po më thoni se nga nisja e akuzave për shmangien e detyruar nga radha e listës së deputeteve gra, në qarkun e Lezhës e deri tek publikimi i disa fakteve, që ju pretendoni se janë selektive, janë shpifje keqdashëse dhe djallëzore?

Pikërisht kështu, e për ta shpjeguar meqë po këmbëngulni, ju pohoj që nuk ka asnjë shkeljeje të ligjit në renditjen time në listën e deputetëve dhe mënyrën e fitimit të mandatit. Nga pikëpamja teknike, pa dashur të zgjatem, nuk ka dy gra të tërhequra nga lista e PS, por vetëm një të tillë, e cila renditej pas meje në listën përkatëse e kushtëzohej nga pikëpamja e shëndetit. Mbi pjesën tjetër u shpreha më lart, por për ta mbyllur me këtë pyetje nuk mund të lë pa përmendur që mënyra e përzgjedhjes së kampit tjetër është ajo që lë hije dyshimi të së njëjtës natyrë për të cilën akuzohem.

 

Por që çuditërisht kjo që ju thoni nuk është përmendur asnjëherë nga forca juaj politike?

Mbase ka vend për autokritikë, por gjithsesi më mirë vonë se kurrë.

 

Me këtë doni të thoni se PS është e vonuar me reagimin ndaj ngjarjeve të ndodhura në qarkun e Lezhës? Kujtoj se Partia Demokratike ka në radhët e saj një deputet të akuzuar për përfshirje në vrasje, në ditën e votimeve, apo se ka heshtur për dorëheqjen e Vasil Bicit, i  katërti në listën e PD-së në qarkun e Lezhës?

Më këtë nënndarje të pyetjeve, ajo çka thashë më lart përbën gurin e fundit të dominosë se gjykoj se çdo zgjatje e mëtejshme do shpërbënte thelbin e asaj që dua të them në tërësinë e intervistës.

 

Për ju thelbi i intervistës është ajo që thatë pak ditë më parë në një status në FB, ku deklaronit se dispononit fakte ndaj Sali Berishës, të cilat do të tronditin opinionin publik?

Personalisht përpiqem të bëj ndarjen mes komunikimit me miqtë e mi, e më lejoni të konsideroj si mjetin më modern të këtij komunikimi dhe komunikimin me të panjohurit e publikun më të gjerë, lexues të medias suaj. Për këtë arsye në këtë intervistë përpiqem të jem më pak emotiv, më i përmbajtur politikisht gjithsesi njëlloj i vërtetë.

D.m.th, vetëm për miqtë tuaj në FB Berisha është ashtu siç është?

Me miqtë e mi në FB ndaj të njëjtat ndjesi negative të fjalëve dhe veprave të Sali Berishës e tek jap intervistë me ju përpiqem të respektoj ndjekësit dhe lexuesit e zellshëm të gazetës suaj. Pra u qëndroj deklaratave që kam bërë.

 

Ju thatë pak më parë se dosja sipas jush është botuar në mënyrë selektive, është siguruar nga ish-zyrtarë të PD në mënyrë të jashtëligjshme, por a do ketë publikime të tjera surprizë për të shkuarën tuaj?

Përmbajtja e sulmeve ndaj meje është burim që shteron shpejt dhe çdo përpjekje për të riqarkulluar ujin e ndenjur jo vetëm që s’do të bëjë pis emrin, figurën dhe punën time, por përkundrazi, do të motivojë edhe më shumë për të asgjësuar një herë e mirë metodën e shantazhit, kërcënimit dhe dhunës verbale si mjet lufte politike në këtë vend e media nga cilido.

Intervistoi: Erion Habilaj