A ka pasur një komplot 4 vjeçar në Bankën e Shqipërisë?

Nga Habjon Hasani

Dje Guvernatori i Shqipërisë foli për herë të parë. Ai u shpreh se Banka që drejton ka marrë të gjitha masat që çdo ditë në vazhdim të jetë një ditë e sigurt për Bankën dhe qytetarët dhe se po bashkëpunon ngushtë me prokurorinë për të identifikuar të gjithë fajtorët e kësaj skeme manipulative, duke theksuar në mënyrë të veçantë se skema në fakt u denoncua nga vetë Banka e Shqipërisë. Kjo deklaratë e Fullanit ka shkuar dje në harmoni dhe me një sërë deklaratash politike që kanë funksionuar kryesisht në të njëjtën linjë mesazhi me të Guvernatorit. Më herët, Banka kishte bërë dhe një njoftim zyrtar në emër të institucionit, duke e klasifikuar vjedhjen si vepër të një numri të ngushtë ‘punonjësish keqbërës’ dhe duke vënë theksin se vjedhja ishte kryer në një Magazinë me rol transitor ku kryen operacione financiare, por se thesari i shtetit, pasuria në ar dhe valutë e shqiptarëve, kasaforta e shtëpisë sonë të përbashkët ishte e ruajtur mirë me kamera dhe atje nuk hynte dot kush.  Ky ishte një sqarim i tepërt në fakt, pasi deri më sot askush nuk ka pretenduar se vjedhja kishte ndodhur në kasafortat e rezervave dhe thesarit, por në një tjetër vend, në Magazinën e Vlerës, që si rregull duhet të jetë gjithashtu një vend i ruajtur mirë, po mirë fare ama.

Çudia mes Bankierëve

Por ndonëse një vend që si rregull duhej të ishte tepër i sigurt, ku ndërhyrja duhej të bëhej vetëm nëpërmjet një procedure strikte që përfshinte të paktën 4 persona, dy prej të cilëve duhej të ishin të dërguar direkt nga Drejtori i Përgjithshëm i Inspektimit. Ndonëse ishte një vend ku auditi i Bankës duhej të kryente  kontrolle periodike gjatë vitit, i arrestuari Bitraj ka thënë se në këtë vend vidhte sasi lekësh që prej 4 vitesh. Nga ana tjetër, Banka është shprehur se në këtë rast mungonin rreth 730 milionë lekë, ku 130 milionë ishin marrë nga arkat me lekët e vjetra të dedikuara për asgjësim, ndërsa pjesa tjetër ishte marrë nga kartëmonedhat fringo, rezervë të Bankës që i shërbejnë asaj për t’i hedhur në treg. Kjo situatë, ka krijuar së fundmi shumë debate mes komunitetit të Bankierëve në vendin tonë. DITA ka kontaktuar disa syresh për t’i konsultuar dhe të gjithë kanë vënë theksin sidomos në një fakt: “Nëse Bitraj ka thënë se e kryente prej 4 vitesh këtë proces dhe kjo është e vërtetë, atëherë kjo sasi prej 730 milionë lekësh është vetëm grabitja e fundit pasi skema ka funksionuar si “Qark i Mbyllur” dhe për mrekulli prej kohësh. Po çfarë është një “Qark i Mbyllur”?

Implikimi i Bankave Private

Sipas disa ekspertëve në bankat shqiptare, manipulimi i lekëve që ndodhen në Magazinën e Vlerës mund të ndodhë nëse procesi bëhet qark i mbyllur dhe nëse cikli i skemës manipulative mbyllet. Për t’u arritur kjo skemë mashtruese, duhet patjetër që jo vetëm të ketë vullnet nga zyrtarë të Bankës së Shqipërisë por dhe bashkëpunim nga Bankat Private të Nivelit të Dytë. (BND). “Shikoni, Banka e Shqipërisë nuk punon me individë në sasi të mëdha, operacionet i kryen me bankat private. Në çdo rast problemi nuk është të vjedhësh por si të fshehësh gjurmët. Dhe gjurmët nuk mund të fshihen nëse truku ndodh vetëm në Bankën Qendrore por duhet se s’bën të kesh dhe bashkëpunimin e një apo disa bankave private”, – tha një ekspert i kontaktuar nga DITA. Ai ofroi për gazetën dje dhe një skemë-alternative që sipas tij është diskutuar gjatë këto ditë dhe është përfolur mes rretheve të bankierëve si një skemë që mund të ishte vënë në zbatim nëse vërtetë në Bankën e Shqipërisë lekët e Magazinës së Vlerës preken prej 4 vitesh siç Bitraj thotë. Tashmë i mbetet prokurorisë të zbulojë nëse bëhet fjalë për një grabitje ordinere të Bitrajt në atë Magazinë apo për djegien e një skeme që funksiononte prej vitesh dhe që kësaj here mund të ketë çeduar. Por prokuroria nga ana e saj, ka vendosur që vlerësimin e situatës si fillim t’ia besojë vetë Auditit të Bankës, ndonëse ky audit, ka një përgjegjësi ekskluzive në rast se Bitraj thotë të vërtetën kur pretendon se grabiste në Magazinë prej 4 vitesh.

Pasuria e frikshme e Ardian Fullanit

Guvernatori i Shqipërisë, Ardian Fullani, për vite me radhë është akuzuar në media për abuzimet në këtë institucion. Madje, opozita e djeshme ka qenë kritikja më e fortë e tij. Edhe pse tashmë duket se ka ndryshuar mendim.

Por, vjedhja e Bankës së Shqipërisë kë rikthyer edhe një herë në qendër të vëmendjes pikërisht atë, Ardian Fullanin. Bledi Mane ka bërë një editorial për të tek TemA, ku tregon pasuritë e frikshme që ka Ardian Fullani. Pasuri për të cilat askush nuk flet nga mediat.

“Vjehrri i guvernatorit, Bajram Xhaja, babai i gjykatëses Arjana Fullani, është aksioner i Fabrikës së Tullave Prezë dhe qysh prej 8 vitesh ka marrë 15 milionë euro kredi nga 4 banka të nivelit të dytë në Tiranë e deri tani nuk ka shlyer asnjë këst. Bankat kanë frikë t’ia kërkojnë për shkak se dhëndri i tij mund t’i penalizojë. Nëse doni më shumë informacion, shfletoni regjistrin e kredive të këqija.

Guvernator Ardian Fullani ka në pronësi një apartament 230 metra katrorë në Bllok, është duke ndërtuar një vilë në Farkë, ka në pronësi një vilë në Golem, ka në pronësi një vilë në fshatin e Samir Manes pas TEG-ut me vlerë rreth 1 milionë euro, komshi me Gjin Gjonin, një vilë me vlerë 250 mijë dollarë në Mavrovo të Maqedonisë, një dyqan 400 metra katrorë te TEG me vlerë 800 mijë euro në emër të vajzës së tij, Fiona Fullani. Bashkëshortja Arjana Fullani dhe e bija e tij, Fjona Fullani, i janë nënshtruar operacioneve për ngushtim stomaku dhe vendosje unaze në një prej spitaleve të Los Angeles në Amerikë me vlerën e 46 mijë dollarëve amerikanë.

Fëmijët e tij tashmë të rritur, Fjona dhe Erik Fullani kanë ndryshuar rreth 21 kolegje dhe shkolla private në Shqipëri dhe disa vende evropiane ku kanë dështuar totalisht. Madje edhe pagesat e shtrenjta për shkolimin e vajzës në Universitetin Luigi Boçoni rreth 18 mijë euro në vit rezultuan fatale derisa pas shumë përpjekjesh të dy fëmijët u diplomuan në universitetin evropina të Henri Çilit në Tiranë”, shkruan Mane.

Një pasuri, që Fullanit do t’ja kishin zili edhe homologët e tij në vendet më të pasura të botës.

***

Gazetari Hoxha: Bitraj s’figuron në listën VIP të kazinove. Në burg kokat e turkut, jo dirigjentët

Ardian Bitraj nuk figuron të jetë në listën e personave VIP të cilët pronarët e kazinove të kryeqytetit disponojnë, ndërkohë që dyshimet janë se këto para janë shfrytëzuar nga një rrjet i mirorganizuar brenda stafit të BSH. Artan Hoxha, gazetari investigativ i emisionit “Xhungël”, thotë se dyshimet e para nga hetimet janë se këto para ose mund të kenë dalë jashtë, ose mund të jenë investuar në Shqipëri për të blerë pasuri të patundshme. Ndërkohë që thotë se çështja do mbyllet me këta që shkojnë në burg, po në burg do shkojnë kokat e turkut.

Komenti i gazetarit Hoxha: “Nuk kanë për të shkuar ata që duhet të shkojnë dhe të japin llogari”, u shpreh ai. “Thuhet që një person i vetëm i ka nxjerrë lekët nga Banka, pra ai super sistemi i cili është tenderuar nga kjo Bankë ka kushtuar me paratë e shqiptarëve dhe trajnimi i njerëzve aty, na e paska rrëzuar një punonjës i zakonshëm i Bankës, i cili ka mbushur xhepat dhe paska dalë me ato para nga andej për 4 vjet dhe është ulur në bastoret e lagjeve dhe aty ka vazhduar të humbi, sepse nuk ka fituar.

Se i bie që ky ka qenë fatzi i jashtëzakonshëm, humbi 7 miliardë dhe ky “mavri” nuk fitoi asnjë lek?!

Si është e mundur që këto para janë vënë në qarkullim në atë rrjetin e zi të lojërave të fatit dhe nuk ka asnjë informacion Shërbimi Informativ për të, nuk ka asnjë informacion Drejtoria e Pastrimit të Parave, sepse me ligj çdo kompani, çdo pikë bastesh, për shuma mbi 1 milion lekë të reja vë në dijeni Drejtorinë e Pastrimit të Parave?!

E dini ju që në çdo kazino ka sistem sigurie dhe sistemi i sigurisë i ka kamerat minimalisht 15 ditë. Ndërkohë mbahen deri në 5 vjet për rastet e dyshuara prej tyre. Jam interesuar para se të vija në emision se si sigurohej. Nuk figuron ky personi të ketë bërë këtë gjëmën e madhe. Nuk figuron ky lojtar kaq i madh në Tiranë.

A e dini që pronarët e kazinove në Tiranë dhe qytetet e tjera kanë një listë të klientëve “VIP”, sepse atje nuk hyn dikush që nuk ka lek. Si ka mundësi që në listën “vip” që kanë këta i ka shpëtuar pikërisht ky emër, ky punonjës i institucionit më të rëndësishëm, të siguruar.

Ky punonjësi te objekti X i ka shpëtuar këtij institucioni Y që mban vendin në këmbë dhe ca më tepër të dilet sot pa pikën e përgjegjësisë dhe të deklarohet pa patur ende një hetim të Prokurorisë.

Me kaq mundësi sa Prokurori i Përgjithshëm i ka vënë në dispozicion hetimit të kësaj çështje, unë e falënderoj atë për kurajon dhe guximin që ka marrë për ta hetuar i vetëm.

Kjo çështje do mbyllet me këta që shkojnë në burg, po në burg do shkojnë “kokat e turkut”. Nuk kanë për të shkuar ata që duhet të shkojnë dhe të japin llogari”, tha ai. Hoxha u shpreh se dyshon për një rrjet të mirorganizuar brenda BSH-së:

“Nga informacionet paraprake të hetimit që kam unë dyshimet e para janë që këto para janë shfrytëzuar nga një rrjet i mirorganizuar brenda stafit BSH-së i cili i ka përdorur për të kryer shkëmbimet ditore në tregun valutor të Tiranës. Këto para janë nxjerrë me dijeni të atyre personave që janë dirigjentët dhe grabitësit e vërtetë të kësaj.

Me dijeninë e tyre janë futur në treg, janë qarkulluar dhe futur sërish, sipas manovrave që janë bërë. Por, mesa duket, një pjesë dyshohet ose ka dalë jashtë shteti ose përdoret të jenë blerë pasuri të patundshme”.