Të kesh baba Filip Çakulin të vjen gjithë shteti në dasmë

Kemi një arsye që i sjellim sot në gazetë. Ai është çifti më i përfolur në rrjetet sociale këtë fundjavë. Në një bashkëbisedim me “Dita”, Zhani Çakuli dhe Danjela Sina  tregojnë detajet e martesës, historinë e njohjes dhe çfarë ndodhi me prezencën e shumtë të politikanëve në ceremoninë që u zhvillua në “Sheraton Hotel” të dielën mbrëma. Njihuni me ta nëpërmjet kësaj bisede

Nga Entela Resuli

Dasma e Zhanit, djalit të drejtuesit të Fiks Fare, Filip Çakulit, ishte një ndër më të përfolurat në rrjetet sociale këtë fundjavë.  Në të mori pjesë pothuajse gjithë qeveria. Aq sa mësohet se në momentin e hapjes së ceremonisë, Filipi ka theksuar me humor se dasma nuk organizohet në kuadrin e arritjeve të 300 ditëve, duke dashur të sqarojë prezencën e madhe të politikanëve në sallë ku ishte, Presidenti i Republikës, kryeprokurori, kryeministri i vendit, kryetari i Parlamentit dhe disa deputetë të Partisë Demokratike dhe Partisë Socialiste. Nuk është e kollajtë të kesh baba Filipin!

Foto e shkrepura gjatë dasmës u  bënë objekt debati edhe në Facebook. U fol për një dasmë super të shtrenjtë e me të ftuar që ngjallën reagime për shkak të përplasjeve që kishte pasur babai i dhëndrit gjatë punës së tij. Megjithatë, këto janë kusure për t’u hequr kur je djalë i një personazhi të tillë. Për të njohur më shumë protagonistët e kësaj dasme që bëri zhurmë gjithandej, ne mundëm të kontaktojmë me çiftin, i cili është duke marrë veten pas një lodhjeje dhe kënaqësie që kanë ndier këto ditë, duke u futur në ditët më të bukura të jetës së tyre. Zhani është gëzimi i parë i çiftit Çakuli, por ai ka edhe një vëlla, Orestin. Kuriozitet se ku u njohën dhe u puq një inxhinier informatike me mësuesen e baletit. Dhëndri tregon se “Me nusen jemi njohur në ditëlindjen e Paolës, gocës së kumbarit tonë të dasmës, Artan Dini”. Nusja, Danjela Sina, punon si mësuese në WAT (shkollë amerikane në Tiranë) dhe  është vajzë e një familjeje të vjetër tiranase. Duke respektuar traditën e familjes së saj, edhe dasma e organizuar nga prindërit ka qenë tipike tironse.

Zhani është 33 vjeç, dhe punon te NJMLF, drejtor i Teknologjisë dhe Informacionit.  Ndërsa Danjela është 22 vjeç. Ajo ka përfunduar këtë vit  studimet për koreografi baleti. Për njohjen e tyre,  të dy thonë njëzëri se ka qenë dashuri me shikim të parë.

Si ndiheni pas dasmës?

Zhani: Të qetë, kemi pasur një muaj shumë të ngarkuar të dy me përgatitjet e dasmave në familjet tona, festa beqarie, pagëzimi i Danjelës, fotot etj. Duke shtuar këtu edhe stresin se si do të dalin, të gjitha këto bëjnë të vetën. Por jemi shumë të kënaqur, pasi çdo gjë përfundoi ashtu  siç e kishim planifikuar.

Danjiela, ju futeni te vajzat që e kishit ëndërruar fustanin e bardhë?

Danjela: Mendoj që si çdo vajzë, sigurisht që e kam ëndërruar fustanin e bardhë dhe jam e lumtur që gjeta atë që kisha imagjinuar. U ndjeva mirë.

Është e lodhshme të përgatitesh për t’u bërë nuse?

Danjela: E vështirë ishte, por më pëlqeu :). Ishte goxha e lodhshme pasi krahas punëve që kemi, jemi marrë dhe me shumicën e detajeve të organizimeve.

Momenti i martesës të dërgon në një tjetër stad të jetës, e ndieni veten të përgatitur?

Zhani: Po, të dy e ndiejmë veten të përgatitur për një përkushtim të tillë. Duhemi shumë dhe nuk u trembemi sfidave të jetës bashkëshortore.

Teksa e kujtoni momentin e parë kur jeni takuar me njëri-tjetrin, ishte një dashuri me shikim të parë apo kjo gjë u konsolidua gjatë rrugës?

Danjela: Mund të themi që ishte dashuri me shikim të parë dhe këtë gjë e vërtetoi edhe koha.

Na treguat pak më parë se sebepi që ju të dy të njiheshit ishte një ditëlindje. Çfarë merite ka Paola në lidhjen tuaj?

Zhani: Njohja jonë ndodhi pikërisht në ditëlindjen e Paolës, pastaj Paolën e kemi edhe kumbare të martesës tonë. Padyshim që ajo i ka gjitha meritat për njohjen tonë.

Zhani, dasma juaj dashje pa dashje u kthye një nga më të famshmet në këtë fundjavë, ju pëlqen ky fakt apo këto janë kusuret e të pasurit baba Filipin?

Zhani: Më pëlqen ky fakt, pasi edhe dasma doli ashtu siç e kishim planifikuar, një çerdhe zogjsh ku të gjithë të ftuarit kaluan një mbrëmje të paharrueshme duke e shumëfishuar edhe gëzimin tonë.

Të bësh një dasmë ku marrin pjesë personat me influentë në politikën shqiptare, çfarë do të thotë për ju?

Zhani: Për neve ishin miq të familjes që erdhën për të gëzuar me neve në ditën më të bukur të jetës tonë.

Keni ndonjë person peng që duhet të ishte në dasmën tuaj, por për një arsye apo një tjetër nuk mundi të ishte prezent?

Jo, megjithëse janë ditë të ngarkuara për këdo pasi planifikojnë pushimet, të gjithë të ftuarit tanë erdhën në këtë gëzim familjar.

Zhani, si janë marrëdhëniet me babanë tuaj, ka qenë Filipi një baba i mirë për ju?

Mund të them që me Filipin më shumë kam marrëdhënie si shok sesa si baba. Unë jam larguar nga familja në moshë të vogël. 18 vjeç. Kreva studimet për informatikë në Greqi dhe kur erdha jetoja në apartament veç familjes. Nuk       takohemi shpesh gjatë javës, pasi të dy jemi të angazhuar me punë, por flasim shpesh dhe flasim si shokë.

Sa ka ndikuar ai në zgjedhjet tuaja në jetë?

Si një shok i mirë, më ka këshilluar dhe më është gjendur gjithnjë pranë.

Mendoni se së shpejti do të bëheni prindër, apo është ende herët ta themi këtë?

Po. E kemi menduar dhe do të na gëzonte 🙂

Njohja

Paola, “sebepi” i lidhjes

Paola është vajza e një prej biznesmenëve më të njohur në Tiranë, mikut të Filipit, Artan Dini. Zhani dhe Danjela janë njohur në ditëlindjen e Paolës, ku ishin ftuar, ai si djali i mikut të Artanit dhe ajo si mësuese e Paolës. Paola është edhe nunesha e Danielës, sepse e ka pagëzuar atë bashkë më vëllanë e saj.