SHËNIM: Për një doktoraturë me titull: “Horror në këngë dasmash”

Ndër titujt e doktoraturave të viteve të fundit, të atyre që i përkasin të ashtëquajturës piramidë e Arsimit të Lartë, përcjellë nga kryeministri Rama si ilustrim i dekadencës totale edhe në lëmën e titujve, ishte dhe një i tillë: “Humori në këngët popullore”, dalë nga Instituti Albanologjik. Titulli vërtet është gudulisës, edhe në raport me akademizmin që duhet të përçojë një punim doktorature, por do ishte patjetër i nevojshëm leximi i punimit, për t`u bindur mbi gallatën ose e kundërta, mbi  seriozitetin, me të cilin i është qasur autori këtij zhanri të artit tonë popullor. Sepse sfidat nuk janë të vogla dhe në këtë drejtim. Ja, po shtohen vetëvrasjet, sidomos ato me varje, pas së cilave po molepsen dhe njerëz me famë, ndërkohë që në një këngë nga repertori i dasmave tona, është një frazë e frikshme: “e vare veten me litaaaaar, oooo Dinooooo!”. Problemi është se nuk kemi të bëjmë me këngë vaji, por me këngë dasme; që do të thotë se në kulmin e ahengut, i këndohet çakërqejf vetëvarjes së një personi me emrin Dino. Duke qëndruar po tek dasmat, prej vitesh  repertorit të tyre i është shtuar dhe një hit i kërcyer, kushtuar fatit të Ali Pashait, me fraza horror: Koka në Stamboll, trupi në Janinë/Të shtrinë Ali Pasha dhe more, o Pasha të shtrinë….

E teksa interpretohen këto vargje, jo vetëm që nuk vuan apo qan kush nga ky kob me një shqiptar famëmadh si Ali Pashai, por adrenalina ndër dasmorë shtohet akoma dhe më tepër, shoqëruar nga ulërima e fishkëllima prej shkallës së lartë të një ilariteti dehës. Ndërkohë, po në çastin kur atmosferën e pushton e dhëna mbi makabritetin e ndarjes së kokës nga trupi të Ali Pashait, nëpër tavolina nis të serviret pjata e dytë, që është fërgesa. Hë, nuk e meriton një punim doktorature ky absurd, përfshirë dhe atë se përse mu tek Ura e Shijakut, dikush vendos të mbledh njëherë bajame e më pas qershi?!     / E.H.