Sa afër dhe sa larg (FOTO)

Eshtë vetëm 4-5 orë larg Tiranës dhe nuk është i mbipopulluar sa… Saranda, për shembull!

Eshtë trashëgimi botërore në listën e UNESCO-s, ku e ke shumë të lehtë të shikosh edhe gjurmë të kalave ilire. Një hotel i vjetër i kohës së Titos i tipit të kampeve të punëtorëve mban ende emrin e mbretëreshës ilire Teuta.

Eshtë i pastër, i qetë, çlodhës dhe me pamje mahnitëse, sidomos gjatë mëngjesit dhe gjatë perëndimit të diellit.

I pozicionuar në një gji piktoresk (dikur një bazë strategjike e marinës jugosllave që sot aktivistët e trashëgimisë kulturore duan ta shndërrojnë në muze) e që vizitohet nga jahte dhe anije të shumta nga i gjithë Mesdheu (dje pamë të ankoruar edhe anije me flamurin amerikan krahas atyre me flamurin gjerman dhe rus), Kotori nuk ka famën e Budvës apo Ulqinit mes shqiptarëve.

Që të kuptohemi: s’kam asgjë parimore kundër bregdetit shqiptar. Ndryshimi, sic po tentoj të shpjegoj, qëndron te detajet…

Por ndoshta edhe për këtë arsye mund të jetë vendi ideal i pushimeve të qeta dhe jo të rrëmujshme për ata që nuk duan masivitetin dhe zhurmat e larta të diskotekave.

I ndërtuar midis shekujve 12 dhe 14 qyteti i vjetër që rrethohet nga rreth 4 kilometra mure të një kalaje pompoze të ngjan me një Venecia të vogël. Venedikasit, në fakt, kanë lënë gjurmët kryesore në këtë fortesë që para tyre zotërohej nga ilirët.

Vendasit janë mikpritës dhe të mësuar me turizmin familjar. Shumë janë të papunë në një vend me rreth 600 mijë banorë që synon të integrohet shpejt në BE (këtu thonë se pas Kroacisë rradhën mund ta ketë Mali i Zi) dhe sezoni i verës është koha që ata të fitojnë pjesën kryesore të të ardhurave të vitit.

Çmimet e akomodimit variojnë, sigurisht sipas mundësive dhe shijeve. Për shembull: mund të marrësh me qëra një dhomë në një shtëpi mbi 200 vjecare prej guri e të paguash vetem 15 euro për natën, ose mund të rezervosh një krevat në Old City Hostel (brenda mureve të kalasë) me një cmim që nis nga 18 euro nëse qëndron minimalisht tri netë.

Ose mund të akomodohesh në hotelet me katër ose pesë yje brenda kalasë ku sigurisht cmimet janë të denja për standartet më të larta (në hotelin Forza Mare për shembull në lagjen Dobrota, mburren me faktin se aty ka pushuar Tom Cruise, Tina Turner apo Brad Pitt).

Ushqimi është ballkanas por mund të gjesh restorante të vogla italiane ku gatuhet shumë mirë. Në Mal të Zi shumica e flasin apo të paktën e kuptojnë gjuhën italiane dhe ndikimi i këtij vendi është pothuajse sa edhe në Shqipëri (një vajzë e mbretit malazez Nikolla ishte Elena, mbretëresha italiane që u martua me Vittorio Emanuele III).

Çmimet si kudo variojnë, por një gjë është e sigurt: nuk janë më të shtrenjta, përkundrazi, janë më të lira se fjala vjen në Dhërmi, Himarë apo në Sarandë e Ksamil.

Përsëris: s’kam asgjë parimore kundër bregdetit shqiptar. Ndryshimi, sic po tentoj të shpjegoj, qëndron te detajet: këtu është më pastër, cdo gjë është e rregullt dhe e paprekur nga shëmtia e ndërtimeve pa leje dhe mbi të gjitha shërbimi i një turizmi kryesisht familjar të bën të ndihesh i mirëpritur. Sikur qoftë dhe për një fundjavë në fund të gushtit apo fillimit të shtatorit.

*historiaime.com