SHËNIM: Jo vetëm paraja e ngre ujin përpjetë!

Në një deklarim dy ditë më parë, ministri i Jashtëm Ditmir Bushati, ia atribuoi varfërisë shkuarjen e një numri shqiptarësh në frontin sirian. Kuptuar literalisht, mospasja e një pune, gjendja e rëndë ekonomike, e ndoshta një skamje, detyron shumë individë që të marrin rrugën për të luajtur “ruletë ruse” në llahtarën siriane.

Besoj se as vetë Bushati nuk e beson atë që ka thënë, por ka menduar se është më mirë që të zhvlerësojë çdo arsye apo motiv tjetër, duke lënë vetëm atë për para, se ndoshta kështu edhe mund të justifikohen, ndërkohë që perëndimit i lëshohet një sinjal se një mbështjeje ekonomike, do ishte mjaft efikase në të ashtëquajturën luftë kundër terrorizmit.

Ama, për ata që besojnë se vërtet vetëm për para shkohet në atë dreqo luftë, do ishte mirë t`u kujtonim se çdo luftë që ka ndodhur e ndodh në këtë botë, është mjaft komplekse, ku përfshihen dhe ata që luajnë me jetën 100 përqind për ideal – ndonëse mund të jetë i mbrapshtë ose i cungët – por dhe ata që tej idealit, shohin dhe ndonjë përfitim material; ndërsa ekstremizmi është i pranishëm kudo dhe në çdo front.

Nuk ka besim, lëvizje apo bllok politik, që veç të urtëve, të mençurve, të emancipuarve, të mos ketë dhe trushkulur apo të rrjedhur, me sjellje e akte ekstreme. Dhe jo gjithnjë, kjo ndodh për para.

Po të vendosësh në peshore tragjeditë njerëzore të kësaj bote, ku në një anë të jenë ato për arsye të rëndomta monetare e materiale, e nga ana tjetër ato për ideale të kulluara, mundet që peshorja të anon nga kjo e dyta. As Bushati vetë nuk është në krye të diplomacisë thjesht për një rrogë! Në këtë botë, nuk është vetëm paraja ajo që e ngre ujin përpjetë!/E.H