Toponimet, deklaratë e shoqatave të emigrantëve shqiptarë në Greqi

Shoqatat e emigrantëve shqiptarë në Greqi (Selanik) janë shumë të shqetësuara për situatën në të cilën janë përfshirë emigrantët shqiptarë dhe kryesisht fëmijët e tyre të lindur në Greqi. Prej muajsh qindra fëmijëve të emigrantëve shqiptarë të lindur në Greqi, u mohohet kalimi i kufirit Shqipëri-Greqi me arsyetimin se shkrimi i toponimeve të vendlindjes në pasaportat e tyre, është në gjuhën shqipe dhe jo në atë ndërkombëtare. Problemi filloi para dy vjetësh me mosnoterizimin nga organet konsullore greke në Shqipëri të çertifikatave të fëmijëve të lindur në Greqi, të cilat nevojiteshin për pajisjen me lejen e qëndrimit të këtyre fëmijëve. Sot kjo vështirësi përfshin edhe pasaportat e të gjithë fëmijëve të lindur në Greqi gjatë 22 vjetëve të emigracionit shqiptar.

Në një deklaratë të këtyre shoqatave dërguar sot në DITA shkruhet:  “Njësimi (standartizimi) i toponimeve në botë vendoset nga Grupi i Ekspertëve mbi Emrat Gjeografikë të Kombeve të Bashkuara. Standartizimi i toponimeve greke nisi në konferencën e 5-të të UNGEGN-së (Kanada, 1987) dhe vendimi më i fundit daton më 2000 (New York) në seancën e 20-të të UNGEGN-së. Ky vendim kushtëzon shkrimin e njëjtë të toponimeve greke në çdo dokument zyrtar vendas apo të huaj. Pra, toponimet greke që në shqip shkruhen: Selanik, Korfuz, Kostur, etj. duhet të shkruhen relativisht: Thessaloniki, Kerkyra, Kastoria. Gjithashtu bazuar në vendimin e konferencës së 9-të të UNGEGN-së (New York, 2007) për standartizimin e emrave të vendeve, në vend të emërtimit shqip Greqi duhet përdorur ajo Greece. Kjo pengesë u ka vështirësuar jetën të gjitha familjeve të emigrantëve shqiptarë në Greqi pasi fëmijëve të tyre iu ndalohet hyrja.

Muajt e fundit kemi parë familje, të cilave iu anullohen lejet e qëndrimit, pa marrë parasysh aspak problemet e jashtëzakonshme që nxjerr ky akt për to. Emigrantët shqiptarë kanë ndërtuar jetën e tyre në Greqi, kanë dhënë dhe vazhdojnë të japin ndihmesë të vyer në këtë vend për mëse 22 vjet. Megjithatë edhe pse kanë kaluar kaq vjet që nga dita e vendimmarrjes, qeveria greke u kujtua sot që ka dhe diçka tjetër për të realizuar me shqiptarët banorë, tashmë, të këtij vendi… Ndërkohë që në shumë dokumenta greke emërtime të tilla nuk e respektojnë këtë vendim. (shih lejet e qëndrimit ku shkruhet Salonica).

Nga ana tjetër qeveria shqiptare vazhdon kokëfortë në qëndrimin e saj për të mos e zbatuar vendimin me efekt ndërkombëtar duke mospërfillur shtetasit shqiptarë, të cilët për 22 vjet me rradhë i shërbejnë mëkëmbjes ekonomike shqiptare. Përfaqësuesit e të dy qeverive takohen sërish e sërish, por problemi në fjalë nuk ka gjetur asnjë zgjidhje. Emigrantët vazhdojnë të përdoren nga të dy palët për të “bindur” njëra-tjetrën se vendimi i UNGEGN-së është i zbatueshëm apo jo sipas këndvështrimit të secilës prej tyre.

Ne nënshkruesit, kërkojmë nga autoritetet shqiptare dhe greke të gjejnë një zgjidhje të menjëhershme të këtij problemi. Emigrantët shqiptarë nuk janë meteorë, por janë qenie njerëzore që u takojnë të dy vendeve dhe qeveritë përkatëse janë të detyruara të përgjigjen për problemet që cënojnë të drejtat e tyre…”

Nënshkruesit:

1. Shoqata e Emigrantëve Shqiptarë “Nënë Tereza”
2. Shoqata Shqiptaro-Greke e Punëtorëve “Progresi”
3. Grupi i Shkrimtarëve Emigrantë “Dega e Blertë”

* Shoqatat e emigrantëve shqiptarë në Selanik njoftojnë për konferencë shtypi të shtunën, më 23 shkurt, ora 12.00 në adresën Zaliki 2, kati i II-të (Pas bashkisë së vjetër të Selanikut).