Vlorë 1997, çfarë fsheh Elisabeta?

Dëshmia e re e ish-truprojes Izet Haxhia: “…Dorëzuam bashkë me Rrahim Micin dhe Arjan Çengon me urdhër të Berishës dy snajpera dhe një rakethedhës për rivalët e Zanit për të nxitur luftën mes bandave në Vlorë. Guvernatorja e sotme në detyrë, ka drejtuar Bankën në 1997, pas arratisjes së Kristaq Lunikut. Ka ofruar makinat e blinduara të Bankës në të njëjtin operacion të fshehtë të SHIK-ut, të urdhëruar nga ish-Presidenti…”

Elisabeta Gjoni nuk e ka për herë të parë që zëvendëson një Guvernator të ikur. Guvernatorja në detyrë e Bankës së Shqipërisë, që ka zëvendësuar këto kohë Ardian Fullanin e arrestuar, ka qenë në të njëjtin pozicion në muajt e ngjarjeve të rënda të 1997-s.

Ajo ka mbajtur postin e zv.Guvernatores dhe ka qenë në krye të Bankës së Shqipërisë pas arratisjes së Guvernatorit Kristaq Luniku gjatë atij viti të trazuar të historisë së vendit.

Dhe në pozicionin e vendim-marrëses në Bankë, ka marrë pjesë në një ngjarje të rëndë deri më tani të papërmendur, por që vjen në dritë nga një kundërreplikë e dytë e ish-truprojes së Berishës, Izet Haxhia.

Z.Haxhia u është përgjigjur dje disa komentuesve online të cilët kanë debatuar për përmendjen e bandave të Vlorës në replikën e Haxhisë me intervistën e Sali Berishës të martën në mbrëmje në kanalin televiziv News 24.

Në këtë intervistë Berisha komentoi me fjali konfuze akuzat e ditëve të fundit të ish-njeriut të tij të afërt duke e quajtur atë një vrasës. Akuzat e Haxhisë ishin më herët pjesë e një interviste të gjatë rrëfim me video që ai i dha gazetares së DITA-s Mira Kazhani nga Turqia ku ndodhet pas ikjes nga Shqipëria në 1999.

Pas replikës së Berishës, Haxhia kundër-replikoi dje në DITA duke dëshmuar disa urdhëra dhe episode të tjerë që ngarkojnë me përgjegjësi të rënda penale ish-Presidentin Sali Berisha.

Një prej tyre ishte një akuzë për furnizimin me armë nga SHIK-u i asaj kohe i bandave që rivalizonin Zani Caushin. Urdhëri për të armatosur banda rivale ka ardhur nga vetë Berisha. Po ç’hyn këtu Elisabeta Gjoni, ish-zv,guvernatore e ’97-s dhe zv.guvernatore e sotme?

Armët për bandat rivale janë çuar nga Tirana në Vlorë me makinat e blinduara që përdoreshin nga Banka e Shqipërisë për transportimin e lekëve. Miratimi është dhënë pikërisht nga Elisabeta Gjoni që bënte detyrën e guvernatores në atë kohë – dëshmon Haxhia.

“Nga fillimi i muajt ka qenë me sa më kujtohet, ka pasë filluar lufta në Vlorë mes bandave të Zanit e Gaxhait për shkak të vrasjes së Kuqos që kishte shkuar për ndërmjetësim për lirimin e biznesmenit Pëllumb Petriti, që mbahej peng nga banda e Zanit – tregoi Haxhia mbrëmë për DITA.

Ai vijon:

“… Pasi është vrarë Kuqo, Pëllumbi bashkë me një person tjetër kanë mundur të ikin nga duart e bandës së Zanit. Kanë ardhë në Tiranë. Pëllumbin e njihja më parë. Më tregoi për çfarë i kishte ndodhur. I thashë: A do të japesh një intervistë në RTSH? Po – më tha. E kam çuar te Linda Ihsani dhe ka bërë intervistën që paraqiste Zanin dhe bandën e tij si grabitës e vrasës, e jo siç mundohej ta paraqiste pala tjetër, si një Robin Hud modern. E kishte pa’ Berisha këtë intervistë.

I kishte pëlqyer dhe pyet B… në telefon. Kemi qenë tek Bar Nikolino. Pyet ata persona a u duhen armë për të luftuar kundërshtarët, por Izeti të mos duket, nuk duhet ta dijnë që jam unë në këtë mes… Berisha thoshte këto… Po – kanë thanë këta dhe asht lanë që dorëzimi i armëve dhe makinave të blindura të bëhet tek stadiumi “Qemal Stafa” rreth orës 9 të darkës. Makinat e Bankës Qëndrore janë dhënë nga Elisabeta Gjoni, që në atë kohë kryente detyrën e Guvernatores së Bankes pas ikjes së Kristaq Lunikut.

Kemi shkuar tek vendi i dorëzimit të armëve dhe makinave. Kam qenë me Rrahim Micin dhe dy persona të tjerë. Kanë ardh persona nga grupi operativ i SHİK-ut që drejtoheshin nga Arjan Çengo. Është bërë dorëzimi i armëve dhe i makinave të blinduara. Kanë qenë dy snajpera të kolauduar, 30 raketa, dhe një raketa-hedhës model rus. Me mulli ka qenë raketa-hedhësi, një armë që gjendej vetëm në SHIK-un e atëhershëm…”

 Deshmia e plote, sot ne DITA print