Qeveria ka dy katolike, por Papa vendos të takojë një… ministër bektashi

Tirana nuk eshte më katolike se papa, por gjatë këtyrë ditëve kushdo që ka ecur në Bulevardin Dëshmorët e Kombit ka parë nga afër atë pjesë katolike të çmuar të klerikëve Shqiptarë, fotot e të cilëve varen si flamuj të një kohe të artë dhe të një të shkuare të errët.

Kjo vizitë e Papa Françeskut është mirëpritur nga Shqipëria si një vjeshtë edhe bekimi për një vend si ky i joni i cili siç thotë vetë edhe Papa ka vuajtur shumë. Kemi vuajtur nga diktatura por edhe nga demokracia.

Axhenda e Papës do të nis me një pritje zyrtare në Kryeministri. Pjesa më interesante por edhe më gjithëpërfshirëse do të jetë mesha që Papa do të mbajë në orën 11 në sheshin që, mban emrin e gruas me origjinë shqiptarë, Nënë Terezës.

Një tjetër fakt interesant është zgjedhja për të takuar vetëm një nga ministrat e kabinetit Rama. I ‘bekuari’ do të jetë Ministri i Brendshëm Saimir Tahiri. Nuk dihet pse kjo zgjedhje e Papa Françeskut, i cili ka të paktën dy katolike në qeverisje, Mimi Kodhelin dhe Lindita Nikollin.

Papa do të takoj një ‘bektashi’ si zoti Tahiri (bejme shaka se me siguri përzgjedhja është bërë jo mbi fakte të përkatësisë fetare por mbi cështje qe kane te bejne me rendesine qe i jepet sigurisë së qytetarëve).

Dhe kushedi me bekimin nga Papa, ministri Tahiri do të ketë më shumë fat në luftën ndaj krimit.

Axhenda e plotë e vizitës së Papës

Konferenca Ipeshkvnore e Shqipërisë publikoi dje programin e detajuar të vizitës së Papa Françeskut në Tiranë, në datën 21 shtator, që nga momenti i nisjes deri në atë të mbërritjes në aeroportin italian.

7:30 Nisja me avion nga Aeroporti i Romës, Fiumicino, për në Tiranë.
9:00 Mbërritja në Aeroportin Ndërkombëtar “Nënë Tereza” të Tiranës.
Pritja zyrtare nga Kryeministri i Shqipërisë dhe disa përfaqësues të Kishës Katolike.
9:30: Ceremonia e mirëseardhjes në oborrin e Presidencës
Vizitë kortezie e Presidentit të Republikës.
10:00 Takim me autoritetet në sallën e pritjes së Presidencës – Fjalim i Atit të Shenjtë.
11:00 Mesha e Shenjtë në Sheshin “Nënë Tereza”. Predikimi i Atit të Shenjtë.
Lutja e Engjëllit të Tënzot dhe fjalët e Atit të Shenjtë. Kryetari i Bashkisë i dorëzon Atit të Shenjtë “Çelësin e Qytetit”.
Do të bashkëkremtojnë me Atin e Shenjtë 2 kardinalë, 18 ipeshkvij, 240 meshtarë, 10 seminarista dhe 4 diakonë.
13:30 Takim dhe drekë me ipeshkvijtë shqiptarë dhe me shpurën papnore në Nunciaturën Apostolike.
Në mjediset e Nunciaturës Apostolike, Ati i Shenjtë do të takojë ministrin e Brendshëm, z. Sajmir Tahiri, me një grup bashkëpunëtorësh të Ministrisë së Brendshme.
16:00 Takim me krerët e besimeve të tjera dhe komuniteteve të krishtera në Universitetin Katolik “Zoja e Këshillit të Mirë” . Ati i Shenjtë, duke vlerësuar bashkëjetesën fetare në Shqipëri, ka shprehur dëshirën të takojë personalisht përfaqësues të komuniteteve fetare të vendit tonë. Në këtë takim do të marrin pjesë përfaqësues nga komuniteti mysliman, ortodoks, bektashian, katolik dhe protestant. Ky takim do të zhvillohet pa praninë e mediave.
17:00 Kremtimi i Lutjes së Mbrëmësores me meshtarët, rregulltarët, rregulltaret, seminaristët dhe lëvizjet laikale në Katedralen e Tiranës. Në këtë takim do të marrin pjesë rreth 800 meshtarë, motra, rregulltarë dhe rregulltare si dhe përfaqësues të lëvizjeve laikale në Shqipëri. Përveç Lutjes së Mbrëmësores, gjatë këtij takimi do të ketë edhe dy dëshmi nga një meshtar dhe një motër që i kanë mbijetuar periudhës së egër të komunizmit.
18:30 Takim me fëmijët e qendrës “Betania” dhe me një përfaqësi personash të qendrave të tjera të bamirësisë të Kishës në Shqipëri në qendrën “Betania”. Qendra “Betania” në Bubq do të jetë ndalesa e fundit e Atit të Shenjtë para nisjes drejt Aeroportit të Rinasit. Në këtë qendër janë të strehuar aktualisht rreth 70 fëmijë, ndër të cilët shumica janë jetimë, ka fëmijë të braktisur dhe me probleme të shumta sociale. Pjesë e këtij takimi do të jenë përfaqësues nga qendra të shumta Caritas nga mbarë Shqipëria, të cilët ushtrojnë veprimtarinë e tyre bamirëse në zona të ndryshme.
19:45 Ceremonia e largimit në Aeroportin Ndërkombëtar “Nënë Tereza” të Tiranës.
20:00 Nisja me avion nga Tirana drejt Aeroportit të Roma Ciampino-s.
21:30 Mbërritja në Aeroportin e Roma Ciampino-s.