Ironi mes Hervin Çulit dhe Arian Çanit për vëllain e ministres, Kumbaro

Këto ditë kanë vërshuar një valë akuzash ndaj regjisorit Arben Kumbaro, vëllait të ministres së Kulturës, Mirela Kumbaro. Regjisori akuzohet sikur ka marrë më shumë se gjysmën e buxhetit nga institucioni që drejton e motra. Një fakti i tillë hidhet poshtë nga drejtori i Teatrit Kombëtar, Hervin Çuli.

Ky i fundit i ka quajtur spekulime dashakeqe zërat që akuzojnë Kumbaron regjisor dhe Kumbaron ministre.

Reagimin për këto akuza Çuli e ka bërë në faqen e tij të Facebook-t, ku ndër të tjera ka patur edhe reagimin e gazetarit, Arian Çani.

Çuli dhe Çani kanë patur miqësi në kohën kur, drejtori i TK-së sot, endej i papunë si shkak të konflikteve që kishte më ish-drejtuesin e Teatrit gjatë qeverisjes së kaluar.

Më poshtë, reagimi i Çulit dhe komenti ironik i gazetarit…

Çuli shkruan: “Jam venë në dijeni nëpërmjet rrjeteve sociale të dy-tre njoftimeve nga grupime anonime në fb se në Teatrin Kombëtar po ndodhka një spekulim i madh me kostot e shfaqjeve të Arben Kumbaros, vëllait të ministres, që kushtoka 60 për qind e buxhetit te TK-së dhe të shfaqjes së Drejtorit që kushtoka 25 për qind të buxhetit të TK-së. Për t’i shqetësuar edhe më tepër shpirtrat e spekulantëve të mjerë që ndryshimet në TK i bëjnë më mjeranë seç janë, sqaroj sa më poshtë vijon: Në sezonin 2014-2015 në TK do ketë 7 premiera. Vepra e Arben Kumbaros “Vrasja e Zhan Pol Maratit” dhe e imja ” E shtunë e diel dhe e hënë” janë projekte të vitit 2015 dhe nuk prekin fare buxhetin e 2014. Gjithsesi veprat më të kushtueshme për sezonin 2014- 2015 janë tre kryevepra skenike që i bëjnë nder TK-së. Ato janë “Liri në Bremen” nga Rainer Verner Fassbinder me regji të Sesilia Plasarit, “Tarufi” i Molierit me regji nga Erion Kame dhe “Vrasja e Zhan Pol Maratit” nga Peter Vaisse me regji nga Arben Kumbaro. E para, ky i fundit është një nga regjisoret më të mirë shqiptare që në tetë vitet që shkuan vuri vetëm një vepër në TK, e vetëm e vetëm se është vëllai i ministres ca syresh dashkan ta përjashtuakan përgjithmonë nga skena e TK-së. E kam për nder që e kam ftuar dhe e falenderoj që pranoi ftesën time. Për sa i përket veprës sime të De Filippos sqaroj se ka koston më të ulët të shfaqjeve që do të vihen në këtë sezon dhe 95 për qind të stafit e ka nga aktoret e punësuar në TK. E kuptoj që edhe mua pasi më përjashtuan për tetë vjetë nga TK-ja të njëjtët syresh duan të më përjashtojnë edhe tani. Për tetë vjet institucioni u shkatërrua nga keq menaxhimi dhe individët në fjalë vaditen me mediokritetin e tyre degradimin e TK-së, që në vitin e fundit vuri vetëm një premirë, ndërkohë që kishte te njëjtin buxhet që TK ka sot kur do vihen në skenë 7 premiera. Sqaroj gjithashtu se këtë sezon 5 nga regjisorët e përzgjedhur janë pjesë e gjeneratës së re dhe e prekin për herë të parë skenën e TK-së. Po ashtu në teatër janë kontraktuar 6 aktorë të rinj dhe priten dhe dy audicione të tjera si kurrë më parë në këto 23 vjet. Gjithsesi secili vazhdon në rrugën e tij, unë në timen dhe spekulantët e mjerë anonimë në të tyren. Një gjë është e sigurt: TK është një institucion në ndryshim rrënjësor, ndryshim që ka filluar dhe nuk ndalet më. Zoti i faltë të paudhët se mua s’kanë ç’më bëjnë”.

Çani:

Çulo? Nuk ke pse justifikohesh… Edhe sikur të jenë 60 për qind e buxhetit, prapë janë pak. E para sepse është vëllai i Kumbaros, e dyta sepse njerëzit kane filluar prenotimet që tani… Hallall t’i ketë Beni… Më mirë vllai i Ministres sesa një njeri kot që s’ka asnjë lidhje me Qeverinë… Ok? Ok pra…

Dhe mos guxojë ta krruaj njeri me Culin tonë… Ok? Ok praaaaaaa…”

E.R