Shëndeti financiar i sistemit bankar u përmirësua në gjysmën e parë të këtij viti. Indeksi i fortësisë financiare, tregues që llogaritet me bazë gjashtëmujore nga Banka e Shqipërisë, u rrit në nivelin 90.9, nga 87.5 që kishte qënë një vit më parë.
Ky indeks përbëhet nga treguesit kryesorë të shëndetit financiar të bankave, si cilësia e aktiveve, gjendja e likuiditetit, përfitueshmëria, kapitalizimi dhe rreziqet e kursit të këmbimit dhe normës së interesit. Për gjysmën e parë të vitit 2014, shumica e përbërësve të indeksit të fortësisë financiare kanë kontribuar pozitivisht në ecurinë e tij.
Rritja e indeksit ka ardhur sidomos falë përmirësimit të ndjeshëm të rezultatit financiar, por edhe falë shëndoshjes së kapitalizimit. Për gjysmën e parë të vitit 2014, sistemi bankar arriti një fitim mjaft të lartë, në vlerën e 6.5 miliardë lekëve, kryesisht falë stabilizimit të shkallës së kredive me probleme.
Treguesi i mjaftueshmërisë së kapitalit arriti në 17.5 për qind, nga 12 për qind që është niveli minimal i kërkuar nga Banka Qendrore. Sistemi bankar paraqitej gjithashtu më likuid dhe raporti mes aktiveve dhe detyrimeve afatshkurtra arriti në mbi 41%, nga 25% që është niveli i kërkuar nga banka e Shqipërisë.
Edhe stress-testet e kryera në gjashtëmujorin e parë kanë konfirmuar se sistemi është në gjendje t’ju rezistojë goditjeve nga mjedisi ekonomik, qoftë edhe në rastin e skenarëve të rënduar.
Mos e keni fjalen per Gjermanin.