Mos kujtojnë se I. Qemali fluturonte vetë

Filozofi i njohur, Artan Fuga, i ka kushtuar një status në faqen e tij në Facebook ngjarjes së ndodhur në Beograd mes Shqipërisë dhe Serbisë. Ai e quan të pashpjegueshme dhe jo logjike pretendimet për të dënuar edhe shqiptarët. Reagimi i tij ka ardhur pas konfirmimit të lajmit se Komisioni i Disiplinës në UEFA nuk do të hetojë Serbinë për thirrjet raciste të tifozëve të vet. Vetëm të dërguarit e saj në stadiumin e Beogradit nuk kanë parë dhe as evidentuar thirrje raciste ndaj shqiptare, edhe pse janë kënduar përgjatë gjithë ndeshjes në kor nga 32 mijë tifozë serbë.

Në statusin e tij, Fuga thotë: “Edhe Serbia dënohet se nuk kishte organizuar si duhet ndeshjen, edhe Shqipëria sepse refuzoi të luante. Pse o gladiatorë ishim ne atje? Kur ndeshja nuk organizohet gjëja më logjike do të ishte pikërisht të mos pranoje të luaje. Parulla të paligjshme??? Po me çfarë e kanë vërtetuar ata se atë banderolë e hodhi Federata shqiptare e Futbollit, a ndonjë shqiptar? Ore po unë lexoj gjithë ditën Aristotelin, por s’ka qitap logjike që t’a hajë këto ore. Ore a ka dënime për mungesë logjike? Se mos më dënoni mua. Dënohesh me 5 shkopinj se nuk ke logjikë more! Apo dëgjojnë ndonjë budalla të paguar në ndonjë televizion shqiptar që krenohet se e njoh unë atë shqiptarin që e hodhi helikopterin APASH në fushë. Pse o me këta delirantët merren ata? Po ata janë të gjithë o amatorë, o delirantë, o të paguar more!!! Ore mos kujtojnë ata se Ismail Qemali fluturonte vetë mbi stadium, se vetëm kjo mund të na penalizojë ne. Ore po kjo nuk ka vend ku të rrijë. Ata as akuzat nuk dinë t’i bëjnë tamam!!! Ore ka avokat FSHF??? Ore mos na dinë idiotë ne se nuk dimë të mbrojmë Shqipërinë me logjikë të lartë!”- e mbyll Profesori mendimin, i cili është ndër më të pëlqyerit orët e fundit në rrjetet sociale.