Auditi: FMN ka dhënë “receta” të gabuara për shtetet e pasura

Sipas një raporti të auditit të brendshëm, Fondi Monetar Ndërkombëtar dha këshilla të gabuara për shtetet gjatë krizës globale dhe e  përshkruan punën e institucionit si të pamatur dhe të parakohshme

Një raport nga Zyra e Pavarur e Auditit (IEO), që monitoron FMN-në pohon se Fondi ka injoruar studimet e tij dhe u ka kërkuar “vendeve të pasura” si SHBA-ja, Gjermania dhe Japonia që të bëjnë shkurtime ekonomike në vitin 2010 dhe 2011 përpara se ekonomitë e tyre të rikuperoheshin nga kriza e vitit 2008. Gjithashtu konsiderohet si vendim i gabuar presioni që i është bërë Bankave Qendrore që këto të jepnin kontribute të njëkohshme financiare për favorizuar konsumin, duke injoruar rrezikun që politika të tilla kanë për ekonomitë në rritje. Këshillat e gabuara vijnë për shkak të shqetësimit që kanë prodhuar nivelet e larta të borxhit dhe deficiteve të mëdha fiskale. Në dokument thuhet se, në vend që të stimulonin rritjen ekonomike dhe nxitjen e mëkëmbjes, këto udhëzime provokuan luhatje të fluksit të kapitalit në ekonomitë në zhvillim. Drejtoresha e FMN-së, Christine Lagarde, nuk vonoi për të kundërshtuar kritikat. Jo vetëm që ajo i hedh poshtë ato, por gjithashtu pohon se këshillat ishin të përshtatshme, duke pasur parasysh klimën ekonomike aktuale. Nga ana e saj, IEO argumenton se analistët e FMN-së duhet të kishin parashikuar joefikasitetin e recetave të tyre. Në fakt në vitin 2012, FMN njohu rreziqet e këshillave të tyre dhe u rekomandoi vendeve të ndryshme që të frenojnë shkurtimet e buxhetit. Sipas raportit, studimet e kryera në kuadër të FMN-së tregojnë të njëjtën gjë, madje edhe para fillimit të krizës, por u injoruan nga institucioni. / O.J