Përballja, Vuçiç heq kufjet dhe irritohet me Ramën

Nga një konferencë e zakonshme për shtyp mes dy krerëve të qeverive, takimi Rama-Vuçiç është kthyer në një shkëmbim replikash dhe qëndrimesh të kundërta për sa i përket çështjes së Kosovës.

“Provokimi” dhe irritimi

“Për Kosovën kemi dy qëndrime krejt të ndryshme, por realiteti është një dhe krejt i pandryshueshëm. Kosova e pavarur, e njohur deri tani nga 108 vende të ndryshme të botës dhe e mbështetur nga vendimi i Gjykatës Ndërkombëtare të Drejtësisë, është një realitet i pamohueshëm dhe i patjetërsueshëm rajonal dhe europian. Ajo duhet respektuar dhe duhet bërë pjesë, ashtu siç po bëhet e integrimit europian, si dhe euroatlantik dhe siç e kam theksuar në samitin e fundit të NATO-s, dua ta përsëris hapur dhe sinqerisht: Njohja e Kosovës nga vende europiane që ende nuk e njohin atë, është në rradhë të parë një çështje sigurie europiane”, tha Rama. Kjo deklaratë ka bërë që të irritohet kryeministri serb Alexander Vuçiç. “Dua të them se nuk kam pritur provokime nga zoti Rama dhe nuk kam pritur që do të flasë për Kosovën dhe Metohinë. Nuk do ta lejoj askënd që të nënçmojë Serbinë në Beograd. Kosova është pjesë e Serbisë dhe nuk ka pasur asnjëherë lidhje me Shqipërinë. Më vjen keq që zoti Rama ka shfrytëzuar rastin që të flasë në lidhje me këtë temë, pavarësisht se nuk jemi marrë vesh më parë”, tha Vuçiç.
Ftesa

Pas këmbënguljes së gazetarëve, nga kryeministri Rama u tha se mund të ketë një vizitë të kryeministrit serb vitin e ardhshëm në Tiranë. “Aleksandër, ju siguroj se në Tiranë ne nuk do të ndihemi të provokuar nëse ju do të keni përsëri të njëjtin qëndrim lidhur me Kosovën, por do të ndihemi thjesht të keqardhur, sepse është një realitet i njohur botërisht nga më shumë se gjysma e Kombeve të Bashkuara dhe është një realitet që sa më shpejt ta njohin, aq më shpejt mund të lëvizim përpara në të gjitha drejtimet dhe kuptimet. E përsëris, që mikpritja jo vetëm do të jetë reciproke, por ju siguroj se ju do të ndjeheni shumë mirë në Tiranë dhe në asnjë mënyrë, asnjë fjalë e thënë prej jush, nuk do të konsiderohet provokim, pavarësisht se mund të jetë tërësisht e ndryshme nga çfarë ne do të prisnim, për një temë apo një temë tjetër”, tha Rama. “Përsa i përket integritetit territorial të Serbisë, kjo nuk do të cënohet prej askujt. Na takon që ne t’i respektojmë këta njerëz dhe ku i kemi gabimet në ndërtimëet e shkollave dhe spitalet dhe se çfarë mund të bëjmë për qytetarët tanë”, tha nga ana e tij Vuçiç.