Nis gara për punësimin e mësuesve të rinj, si bëhet aplikimi online

Hapet gara për vendet e reja të punës në arsim. Mësuesit e profileve të ndryshme që janë në kërkim të një vendi pune mund të aplikojnë në portalin online, që është bërë i aksesueshëm gjatë pasdites së djeshme. Autoritetet e arsimit sqarojnë se për fazën e parë aplikimet do të zhvillohen online në portalin zyrtar, www.mesues.arsimi.gov.al, deri në datën 27 nëntor.

Duke specifikuar të dhënat e tyre profesionale mësuesit që bëhen pjesë e kësaj skeme, pas datës 1 dhjetor do t’i nënshtrohen një testimi kombëtar, ku më pas do të fitojnë vendin e punës mësuesit që kanë rezultatet më të larta në provim, si dhe kanë bërë përzgjedhjen e duhur të preferencave mbi lëndën dhe shkollën ku duan të punësohen. Sipas ekspertëve të arsimit duhet bërë shumë kujdes gjatë fazës së aplikimit, e cila lejohet vetëm një herë, dhe nëse të dhënat konfirmohen nuk mund të bëhen më ndryshime në të.

Pas plotësimit të eksperiencës profesionale mësuesit do të listojnë edhe tre preferenca, ku të përcaktojnë mundësitë e largimit nga vendbanimi i tyre për të dhënë mësim.

Gjatë prezantimit të kësaj nisme, Ministrja e Arsimit Lindita Nikolla inkurajoi të gjithë ata mësues të cilët do shprehin dëshirën për të punuar në zona të largëta nga vendbanimi i tyre, ku janë identifikuar mungesa, ku tha se kjo kategori mësuesish do të mbështet nga qeveria shqiptare me një projekt të veçantë ndihme.

Nëpërmjet portalit “Mësues për Shqipërinë” do të publikohen për çdo Drejtori Rajonale jo vetëm kërkesa të punësimit për çdo kurrikul, por edhe statistika të rezultateve të arritura të rankuara në bazë të pikëve të përfituara në testimin përkatës. Në vijim të shkrimit gjeni të detajuar procedurën e plotë se si do të veprohet gjatë aplikimit online, si dhe fushat ku duhet të bëni kujdes për të mos rrezikuar djegien e aplikimit të bërë. Procesi i testimit të aplikantëve në sistemin arsimor parauniversitar do të drejtohet nga MAS dhe do të organizohet e administrohet nga Instituti i Zhvillimit të Arsimit (IZHA) dhe DAR, si dhe do të monitorohet nga Inspektorati Shtetëror i Arsimit.

Procedura se si do aplikohet

Për të aplikuar çdo mësues duhet të hyjë në faqen zyrtare online të Ministrisë së Arsimit. Portali Mësues për Shqipërinë është tashmë i linkuar në faqen zyrtare të Ministrisë së Arsimit dhe Sportit, si dhe në faqet zyrtare të çdo drejtorie arsimore në linkun përkatës www.mesues.arsimi.gov.al.

Për të kryer regjistrimin tuaj plotësimi i të gjitha fushave është i detyrueshëm. Fillimisht ju duhet të plotësoni në faqen e hapur të dhënat përkatëse që kanë të bëjnë me: “Emër, atësi, mbiemër, numrin personal të letërnjoftimit tuaj, i cili ndodhet poshtë në të djathtë të letërnjoftimit”. Më pas do të shfaqet një kalendar ku duhet të zgjidhni datëlindjen tuaj.

Shkruani Vendlindjen tuaj duke ju referuar të dhënave dhe formatit të kartës suaj të identitetit (letërnjoftimit). Nga lista përkatëse e shfaqur duhet të zgjidhni vendbanimin tuaj aktual dhe ta plotësoni. Më pas zgjidhni dokumentin, kartën tuaj të identitetit të skanuar që do ngarkoni në sistem në formatin”doc, doce, jug, pdf”, duke shtypur butonin “Choose File”.

Pasi ta keni zgjedhur do ju shfaqet dokumenti i ngarkuar. Në fazën e mëtejshme duhet të plotësoni numrin tuaj të telefonit, të shkruani adresën tuaj të saktë të e-mail-it, për t’u informuar për çdo vijim të mëtejshëm të procedurave që do të ndiqen.

Faza e aplikimit online vijon më tej me zgjedhjen e nivelit tuaj arsimor të përfunduar që shfaqet në listë konkretisht: “Bachelor, Master Profesional, Master i Shkencave/Master i Arteve të Bukura, DIND (Diplomë e Integruar e Nivelit të Dy”. Më tej do të përzgjidhni institucionin e arsimit të lartë ku keni kryer studimet nga lista e shfaqur e universiteteve. Plotësoni duke shkruar titullin e Diplomës, e cila është e cituar në diplomën tuaj. Hapi tjetër vijon me plotësimin e vitit të përfundimit të studimeve, mesataren e studimeve tuaja të shprehur numër me dy presje dhjetore.

Ngarkoni në sistem diplomën universitare të skanuar duke zgjidhur (choose file) dokumentin që do të ngarkoni, sipas formatit të përcaktuar. Pasi ta keni zgjedhur do ju shfaqet dokumenti i ngarkuar. Plotësoni vitet e punës suaj si mësues në listën e shfaqur, konkretisht sipas ndarjes: , kur nuk ka, kur keni 1-3 vite pune, 3-5 vite punë, 5-10 vite, ose më shumë.

Zgjidhni kategorinë e kualifikimit tuaj si mësues nga lista që do ju shfaqet. Plotësoni duke shkruar trajnimet, kualifikimet, si dhe zhvillimin profesional tuajin duke përmendur çertifikimet që zotëroni. Më tej do detajohen edhe gjuhët e huaja që zotëroni, dhe njohuritë kompjuterike. Në pikën 19 të aplikimit duhet të specifikoni drejtorinë e arsimit ku dëshironi të punësoheni të listuara sipas ndarjes dhe preferencën tuaj, e cila mund të jetë preferencë e parë, dytë, si dhe preferencë e tretë.

Po gjatë kësaj faze përcaktohet edhe drejtoria ku do të jepni provimin, duke përzgjehdur më pas edhe profilin e testit për të cilin aplikoni, sipas listës së shpallur referuar udhëzimit përkatës për “Organizimin e testimit të aplikantëve në mësuesi”. Ky aplikim do të jetë pjesë e dosjes suaj personale.

Si mund të aplikoj për të marrë pjesë në Nismën “Mësues për Shqipërinë”?

Çdo i interesuar për të aplikuar në portal duhet të aplikojë në faqen zyrtare www.mesues.arsimi.gov.al. Afatet e aplikimit janë nga data 12-27 nëntor 2014.

A është e nevojshme të dorëzoj dokumente të printuara përpara testimit? Ku?

Nuk është i nevojshëm dorëzimi i dokumenteve në ketë fazë. Aplikimi është vetëdeklarim, dhe në momentin e ofrimit të vendit të punës, me paraqitjen e dokumentacionit origjinal, çdo deklarim i rremë, apo i ndryshëm nga formati, do të bëjë s’kualifikim të menjëhershëm të kandidatit.

Kush ka të drejtë të aplikojë?

• Çdo individ i cili ka përfunduar studimet e larta në profilet e mësuesisë në institucionet e arsimit të lartë brenda vendit ose jashtë. Për individët që kanë përfunduar studimet e tyre jashtë kërkohet ekuivalentimi i diplomës në përputhje me dispozitat ligjore.
• Çdo individ punëkërkues në zonën ku banon ose që shpreh interesin e tij për të kontribuar si vullnetar në zona të tjera të vendit.
• Çdo individ i cili aktualisht është në marrëdhënie pune provizore si mësues me kontratë.

Kur dhe si do të shpallen datat e provimeve?

Në periudhën 27 nëntor deri në 1 dhjetor do të publikohen në portal, lista e individëve që do të marrin pjesë në testim, kalendari i testimeve për secilën drejtori arsimore në vend, ambientet e testimeve, si dhe llojet e testeve që do të kryhen.

Kur dhe si do të shpallen vendet vakante në arsim?

Shpallja e vendeve vakante për çdo shkollë të arsimit parauniversitar do të bëhet publike pas datës 20 nëntor. Ministria e Arsimit ka vendosur që të zbardhë vendet vakante në portal pas kësaj date.

Çfarë nevojitet për të pasur një formular të plotësuar saktë?

Çdo i interesuar duhet të ngarkojë gjatë plotësimit të formularit dy dokumente: “Diploma universitare e nivelit më të lartë në profilin përkatës të mësuesisë, si dhe dokumenti identifikues, që mund të jetë Karta e identitetit ose pasaporta personale. Një individ që dëshiron të aplikojë duhet të tregojë kujdes në plotësimin e këtij formulari pasi nuk ka të drejtë ta përsërisë atë pas konfirmimit të aplikimit

Sa herë është e mundur që të aplikohet në portal?

Ju duhet të aplikoni vetëm një herë. Duhet të tregoheni të kujdesshëm në plotësimin e fushave. Pas konfirmimit nuk keni më mundësi të bëni ndryshime.

Kur do te fillojë testimi?

Testimi do të fillojë pas datës 1 dhjetor. Kalendari I testimeve sipas profileve dhe Drejtorive Arsimore Rajonale do të bëhet publik në ambientet e portalit. Procesi i testimit për fazën e parë do të zhvillohet njëherësh në të gjitha drejtoritë arsimore në vend.

Ku do të behet testimi dhe a mund të ndryshohet zona e testimit pavarësisht vendbanimit?

Testimi do të behet në ambientet e përcaktuara nga Drejtoritë Rajonale, të cilat do të jenë të publikuara në ambientet e portalit. Gjatë plotësimit të formularit ju mund të zgjidhni vetë Drejtorinë Arsimore ku doni të zhvilloni testimin. Kandidatë për t’u testuar do të jenë të gjithë aplikantët që kanë diplomë mësuesie sipas dispozitave në fuqi.

A duhet të dorëzohet dosja e aplikimit në Drejtorinë arsimore?

Po dosja duhet të dorëzohet pas afishimit të kandidateve dhe forma e aplikimit në portal duhet të jetë pjesë e dosjes

Për çfarë do të testohen mësuesit aplikues?

Testimi i të gjithë kandidatëve për testim do të jetë në përputhje me profilin e tyre. Orientimet në lidhje me testimet sipas profileve do të behën publike në ambientet e këtij portali. Rezultatet e testimit do të behën publike në ambientet e portalit. Gjithashtu afatet e këtyre rezultateve do të jenë në përputhje me rregulloren e procesit të testimit dhe do të behën publike në portal. Rankimi i fituesve do të bëhet në përputhje me rezultatet e tyre për çdo DAR/ZA dhe referuar profilit sipas preferencës së parë të zgjedhur

Ç‘nënkupton sistemi i preferencës së zgjedhur?

Preferenca nënkupton dëshirën dhe mundësinë e individit për t’u angazhuar si mësues jo vetëm në vendbanimin e tij, por edhe në zona të tjera. Aplikuesit kanë deri në tre mundësi të gjenerojnë informacion në lidhje me preferencën e tyre.

Cili është probabiliteti i punësimit pas përfundimit të testimit?

Kjo do të varet nga preferenca e zgjedhur dhe vendet e shpallura vakante për çdo Drejtori dhe Zyrë Rajonale (DAR/ZA).