Një spiun në Gjykatë informoi ish-drejtorin e Lojërave të Fatit

Një spiun në Gjykatën e Tiranës dyshohet se ka ndihmuar ish-drejtorin e Lojërave të Fatit në Ministrinë e Financave, aktualisht nëndrejtor i Ujësjellës-Kanalizimeve të Tiranës, që të arratiset para se policia t’i shkonte në banesë për ta prangosur.

Besnik Çobaj figuron prej një jave i shpallur në kërkim, ndërsa mendohet se qëndron i fshehur tek ndonjë prej të afërmve të tij, ose të ketë dalë ilegalisht jashtë vendit, pasi sipas sistemit TIMS nuk ka kaluar nëpërmjet pikave kufitare.

Çobaj është denoncuar nga Ministria e Financave vitin e kaluar për shkak të skandalit me pikat e lojërave të fatit pa licencë, duke i shkaktuar dëm ekonomik arkës së shtetit me 250 milionë lekë të reja shmangie nga taksat dhe tatimet për makineritë.

Javën e kaluar, Prokuroria e Tiranës ka bërë kërkesë në Gjykatën e Tiranës për masë sigurie “arrest në burg” në fshehtësi të plotë, siç e kërkojnë procedurat, por kur uniformat blu shkuan të ekzekutonin masën e aprovuar, zyrtari nuk gjendej në banesë.

Lajmi është mbajtur sekret deri ditën e djeshme, pasi policia prej një jave nuk e gjente dot. Por dyshohet se Çobaj ka marrë informacion nga brenda Gjykatës së Tiranës. Sepse në dijeni të lajmit për masën “arrest me burg” kanë qenë vetëm gjyqtari i çështjes dhe prokurori.

Masa në fshehtësi
Që prej të shtunës së kaluar, Gjykata e Tiranës ka pranuar kërkesën e prokurorit të Njësisë Task-Force, Dritan Rreshka dhe ka dhënë masën “arrest me burg” në mungesë ndaj ish-drejtorit të Lojërave të Fatit, Besnik Çobaj.

Megjithëse duhet të ishte në detyrën që mban si nëndrejtor i UKT-së, Çobaj nuk gjendet as në zyrë dhe as në shtëpi. Policia dhe Prokuroria dyshojnë se dhënia e vendimit është dekonspiruar nga brenda Gjykatës së Tiranës. Dhe kjo ka ndodhur ditën që është dërguar kërkesa për “arrest me burg”. Ende nuk dihet se kush mund të jetë ky informator, por në dijeni kanë qenë vetëm prokurori dhe gjyqtari. Prokuroria ka nisur verifikime për rrjedhjen e informacionit paralelisht me atë të hetimeve për rastin.

Nga këqyrja që prokurorët dhe policia kanë bërë në sistemin TIMS rezulton se Çobaj, i dyshuar për “shpërdorim detyre”, nuk ka dalë jashtë vendit, por ndodhet në Shqipëri. Gjithsesi nuk përjashtohet edhe mundësia që ai të ketë ikur ilegalisht nga vendi, me dokumente false ose në rrugë tokësore nga kufiri. Por një tjetër fakt është se menjëherë pas masës së sigurisë ai është përfaqësuar nga një avokat, ndërsa vetë nuk gjendej. Avokati ka bërë apelimin e masës në mungesë në Gjykatën e Apelit.

Dosja hetimore
Prokurori Dritan Rreshka kishte nisur hetimet për ish-drejtorin Çobaj në muajin nëntor 2013, pas kallëzimi të Ministrisë së Financave. Kallëzimi ka lidhje me valën e operacionit policor “Fundi i Marrëzisë”, për lojërat e fatit dhe Çobaj dyshohet të mos ketë marrë masa për konfiskimin e automateve elektronike dhe pajisjeve të tjera të lojërave të fatit, të cilat janë konstatuar të pa licencuara nga kontrollet e kryera nga po ky institucion.

Dëmi ekonomik i shkaktuar përllogaritet në 250 milionë lekë të reja në arkën e shtetit. Dhe sipas hetimeve rezulton se pavarësisht se ka bërë kontrolle në Tiranë, Shkodër dhe rrethe të tjera, Njësia e Mbikëqyrjes së Lojërave të Fatit që varej nga Çobaj, nuk ka marrë masa. Kurse nga kontrolli i mëvonshëm në shtator rezultoi se 140 automate elektronike ishin të paregjistruara në mbi 70 subjekte të pa licencuara.