Përpjekja e Mal Berishës për të qëndruar Ambasador

Ambasadori ynë në Britaninë e Madhe duket se po përpiqet fort për të mbajtur detyrën si diplomat. Ministria e Jashtme ka përgatitur me kohë dosjen e shkarkimit të ambasadorit tonë në Britaninë e Madhe, Mal Berisha, e cila do t’i dërgohet shumë shpejt presidentit Bujar Nishani bashkë me kërkesën për shkarkimin e tij.

Gjithsesi, largimi i tij nga diplomacia duket tepër i vështirë, për shkak të lidhjeve të këtij të fundit me Presidentin dhe me të djathtën. Jo më kot, fotoja e postuar prej vetë ambasadorit tonë në facebook, ku ka dalë me Presidentin Nishani dhe Zonjën e Parë, një nga pëlqimet e para e ka marrë nga dhëndri i Sali Berishës, Jamarbër Malltezi.

Mal Berisha është një emër i njohur në diplomacinë shqiptare. Por më shumë ai është bërë i njohur për faktin se nuk arriti të bëhet asnjë herë tamam ambasador, pasi nuk dekretohej nga presidentët..

Berisha është diplomuar në Institutin e Lartë të Arteve për etnomuzikologji dhe ka bërë edhe studime në atë fushë. Më pas u diplomua për diplomaci në Ankara, në vitet 1993-1997 shërbeu si konsull i Shqipërisë në Stamboll. Gjatë viteve 1998-2000 është marrë me çështjen e Kosovës pranë Ligës Qytetare Shqiptaro – Amerikane në Nju Jork, ShBA. Nga viti 2000 deri në Mars të vitit 2009 ka punuar në Departamentin e Drejtësisë në Misionin e Kombeve të Bashkuara në Kosovë. Pas kthimit të PD-së në pushtet në 2005, dështoi që të dekretohej ambasador, sepse opozita në Kuvend e cilësonte njeri politik dhe nga ana tjetër nuk dekretohej nga presidenti. Pas disa orvatjesh të dështuara për t’u bërë ambasador në Gjermani, në 17 shkurt 2012 me vendim të qeverisë bëhet i Ngarkuar me Punë në Britaninë e Madhe, sepse pas largimit të ambasadorit Zef Mazi ambasada ishte pa drejtues, rol që e luante zv.ambasadorja Teuta Starova, gruaja e ish-zv.ministrit të Mbrojtjes, Arjan Starova.