Ambasada amerikane sqaron lëshimin e vizave tre vjeçare për në SHBA

Pas deklaratës së djeshme të ambasadorit amerikan, se shqiptarët do kenë mundësi për marrjen e vizave tre vjeçare, ka reaguar edhe ambasada amerikane në Tiranë.

Ajo ka shpjeguar lëshimin e vizave, duke thënë se standartet e marrjes së saj nuk ndryshojnë.

“Ashtu si edhe deklaroi Ambasadori Arvizu mbrëmë, Ambasada Amerikane në Tiranë do të japë viza tre vjeçare studentore, vizitori dhe punësimi, për të gjithë ata qytetarë shqiptarë që kualifikohen.

Kjo do të thotë që nëse ju konsideroheni të kualifikuar dhe merrni një vizë për të vizituar Shtetet e Bashkuara, viza juaj do të jetë e vlefshme për 3 vjet në vend të një viti.

Kjo periudhë e re vlefshmërie do ta bëjë më të lehtë për shqiptarët të cilët bëjnë pushimet, studiojnë, bëjnë biznes apo vizitojnë familjet e tyre në Shtetet e Bashkuara vazhdimisht.

Është e rëndësishme të theksohet se kualifikimet për marrjen e një vize nuk kanë ndryshuar – secili aplikant duhet të tregojë se do e përdorë vizën ashtu si duhet dhe nuk synon të emigrojë ilegalisht në Shtetet e Bashkuara,” thuhet në deklaratën e ambasadës amerikane në Tiranë.

Ambasadori Arvizu tha mbrëmë në një intervistë televizive se  “Ata që kualifikohen për të marrë vizë për në SHBA, duke nisur nga nesër, do kenë mundësinë që ta kenë atë për tre vjet. Pra, viza e marrë është tri vjeçare”, ka thënë Arvizu.

Ai ka thënë se më pas këto viza mund të kenë vlerë 5-vjeçare. Ndërsa për liberalizimin e tyre, Arvizu ka thënë se duhet shumë punë. Në këtë listë bëjnë pjesë një grup shumë i vogël vendesh. Në SHBA mund të shkojnë pa viza shtetasit e vetëm 35 vendeve.