SHËNIM: Hakmarrja juaj, detyrimi ynë!

Mediat kanë bërë publike disa detaje të dhëna rreth një grupi tritolvënësish, arrestuar ditë më parë në Durrës. Sipas bisedave të përgjuara, ka dalë në pah që ata, jo vetëm i përgatisnin minat e telekomanduara me tritol e celularë, por dhe i realizonin vetë atë, sipas kërkesave dhe porosive.

Kjo të çon t`i imagjinosh ata si një kompani e specializuar për të tilla shërbime, me sekretari, holl e departamente. E kur futej klienti aty, i jepej një listë shërbimesh me tarifa përkatëse, ku në krye theksohej se shërbimi që ofrohej aty ishte i kompletuar me të gjitha fazat.

Ndërsa më poshtë, ishin detajimet përkatëse si: Shpërthim me marrje jete – vlera…; me plagosje ose sakatim – vlera…; me frikësim – vlera…Më pas renditeshin objektivat: banesë, automjet, institucione, lokale, shtylla tensioni, ku çmimi varion sipas rëndësisë së objektivit dhe vështirësisë së aksionit.

Nga fundi i listës, shkruhej se klienti mund ta përcaktonte vetë se në ç`kohë e dëshironte ta merrte lajmin: në edicionet e mëngjesit, të drekës e pasdites apo aty nga mbrëmja. Sa për pagesën, thuhej se fillimisht derdhej 30 përqind e shumës, e më pas, pas daljes së lajmit në media, bëhej dhe derdhja e 70 përqindëshit.

Po të ndodhte që synimi final i atentatit të mos arrihej – fjala vjen, shënjestra mbetej gjallë, ndërkohë që i duhej marrë jeta, 70 përqindshi i shumës nuk paguhej, por mbetej vetëm 30 përqindëshi. Lista mbyllej me slloganin: “Hakmarrja juaj, detyrimi ynë!”/E.H