Vëllai i Olldashit: Kol, sa shumë miq janë larguar, disa se nuk u duhesh, të tjerë se u prishet biografia

Ai ka më shumë se një vit që është ndarë nga jeta, por për shumëkënd që e ka njohur nga afër dhe për familjarët e tij mbetet i paharruar.

Pavarësisht se dosja u mbyll dhe gjithçka çka ndodhi mbrëmjen e 21 nëntorit u quajt aksident, kjo ngjarje ka lënë pas një plagë të hapur dhe shumë pikëpyetje.

Familjarët e Sokol Olldashit e kanë reflektuar mërzinë që kanë me miqtë dhe bashkëpunëtorët e tij, sidomos ata të partisë. Ata nuk kanë nguruar të thonë se një ditë ai u la vetëm.

Edhe pse janë shprehur të rezervuar herë pas here, ndoshta, një ditë, koha do t’i nxjerrë të gjitha problemet në breg dhe atëherë do të mund të kuptohet shkoqur se çfarë ndodhi me miqtë e ish- deputetit të Partisë Demokratike.

Vdekja e të ndjerit Sokol Olldashi është përjetuar keq nga shumë njerëz, sidomos familja e tij.

Vëllai i Sokolit, Ardian Olldashi, tregon se çfarë i ka thënë më 22 korrik 2013, pak kohë para vdekjes. Ai ka nxjerrë nga arkiva e tij një bisedë të ndjerë që ka bërë më të vëllain.

Mesazhi është i qartë, sepse ai erdhi pak javë para humbjes së PD, ku Olldashi ishte ministër i Transporteve dhe më tej kandidati i dytë për postin e kreut të opozitës.

Ardiani shprehet i indinjuar me disa njerëz dhe e këshillon vëllanë:

“I dashur Kol, e mban mend se çfarë të shkruaja në 22 korrik, në darkë vonë? Po ta përsëris: Kam vënë re sa shume “miq” të janë larguar. Disa se nuk u duhesh më, të tjerët kanë frikë se u prishet biografia, ndërkohë që ndërgjegjen gjithmonë të prishur e kanë pasur. Por shumë e shumë të tjerë të kanë qëndruar, janë ata që nuk pritën kurrë gjë nga ty.

Derisa dora dhe mendja do të të udhëheqin mos pusho së dashuruari jetën. Dhe në paç mundësi të ndihmosh një njeri të vetëm, nuk do kesh jetuar së koti.

Mos vështro njerëz të vegjël që të vijnë rrotull, por vështro njeriun e madh qe është në brendësinë tende. Jeto duke konsideruar veten tënde në pazhurmësi dhe kështu do të rigjesh qetësinë dhe paqen.

Në mes zhurmës nuk ndihen frymëmarrjet dhe psherëtimat e njerëzve që të duan. Bëj të mundur mosndjesinë e ligësisë njerëzore, por vlerëso mirësinë e tyre”, – përfundon mesazhi i Ardian Olldashit për të ndjerin Sokol Olldashi.