Takohen Renzi dhe Merkel: Së bashku për të ndryshuar historinë e Europës

Kryeministri italian, Matteo Renzi, dhe kancelaria gjermane, Angela Merkel, zhvilluam dje një takim dypalësh në Firence. Në një konferencë shtypi të përbashkët ata vlerësuan vendimin e fundit të Bankës Qendrore Europiane (BQE) si një shtysë për rikuperimin ekonomik të Bashkimit Europian. “Mendoj se çdo gjë që do të vihet në praktikë do të japë një nxitje për rikuperimin ekonomik.

Gjithmonë mund të bësh më shumë, por ajo që është bërë, është bërë, tani duhet të punojmë”, tha Renzi në fund të takimit dypalësh të dy liderëve në qytetin toskan, qytet që kryeministri e drejtoi si Kryetar Bashkie para se të emërohej kreu i qeverisë italiane. Renzi u shfaq para shtypit së bashku me Merkel për të analizuar masat e fundit të marra nga Bashkimi Europian dhe siguroi se vendime si ato të BQE-së të njoftuara nga presidenti i saj, Mario Draghi, nuk duhet të shihen si një justifikim për të bllokuar reformat. “Italia mundet dhe duhet të bëjë reforma.

Tani duhet të ecim më shpejtë, të jemi të vendosur”, shtoi Renzi përpara skulpturës së Davidit të Miguel Angel në Galerinë e Akademisë së Firences. Takimi italo-gjerman vjen në një moment ku qeveria e Renzit tenton të kryejë reformat e njoftuara një vit më parë, por aprovimi definitiv i të cilave është ngadalësuar për të shkak të proceduarave parlamentare. Pas aprovimit të reformës së punës që solli për Renzin kundërshtinë e sindikatave e që u manifestua me një grevë të përgjithshme në dhjetor, kryeministri tenton të çojë tani përpara reformën e ligjit elektoral me mbështetjen e ish kryeministrit konservator Silvio Berlusconi.

Merkel nuk nguroi të vlerësonte publikisht reformat e ndërmarra nga Renzi dhe tha se plani i shefit të qeverisë italiane është shumë ambicioz dhe i rëndësishëm dhe pohoi me besim se do të sillnin rezultate. “Kryeministri italian ka një plan reformash jashtëzakonisht ambicioze, do t’ kthejë shpresën të rinjve dhe sigurinë njerëzve”, tha ajo. Dy liderët ranë dakord që Italia dhe Gjermania së bashkë duhet të ndryshojnë historinë e Europës duke entuziazmuar të rinjtë në emër të idealit të përbashkët evropian kundër atyre që duan të shkatërrojnë bashkimin e BE-së.

Kreu i qeverisë italiane falënderoi më pas kancelaren duke u shprehur krenar për miqësinë italo-gjermane “Falënderoj në mënyrë të veçantë Angelan. Në muajt e ardhshëm do të kemi shumë punë për të bërë dhe besoj se historia e madhe e miqësisë italo-gjermane do të shkruaj në muajt e ardhshëm faqet më të bukura të saj”, pohoi ai.