Sfida e Idrizit: Të heqim skuadrat tona nga bastet

Presidenti i Flamurtarit, Sinan Idrizi e konsideroi një komedi dhe të turpshme sjelljen e futbollistëve të Teutës në përfundim të takimit me vlonjatët, që morën tri pikë të dyshimta pas pasivitetit të lojtarëve durrsakë në kohën shtesë. Sipas numrit një të klubi të Flamurtarit, është vënë në pikëpyetje vetë kampionati shqiptar.

“Ishte një komedi e turpshme që tregon se është i sëmurë i tërë sistemi dhe që vë në pikëpyetje kampionatin. Kjo që po ndodh vë në diskutim vazhdimësinë time dhe të ortakëve te mi në krye të Flamurtarit”, tha presidenti i Flamurtarit.

Idrizi u bën një ftesë të hapur të gjithë presidentëve të Superiores për të dalë nga kjo krizë e thellë morale, duke mos lejuar kuotimin skuadrave shqiptare në kompanitë e basteve.

“I ftoj të gjithë presidentët e superiores që t’i heqim ekipet tona nga bastet. Kjo është një sfidë që u bëj kolegëve të mi, që ndoshta kanë më shumë eksperiencë, për ta zhbërë këtë sistem”, theksoi Idrizi.

Nëse nuk do të ketë një reagim nga organet përkatëse për të mbrojtur investimet e ndershme të tij dhe të ortakëve të tjerë turq, Idrizi paralajmëroi tërheqjen nga investimet në futbollin shqiptar.

“Nëse nuk merren masa, sigurisht që unë nuk mund të vazhdoj të qëndroj në këtë detyrë. Për këtë as që duhet të keni dyshim”, theksoi numri një i klubit vlonjat.

Ndërkohë për sfidën e shumëpërfolur Flamurtari-Teuta 2-1 ka reaguar edhe Federata Shqiptare e Futbollit, që ka urdhëruar të gjitha instancat e saj për të mbledhur faktet dhe për të nxjerrë para përgjegjësisë aktorët e futbollit farsë. Të gjitha provat e mbledhura do t’i vihen në dispozicion Komisionit të Etikës, që do të vendosë për masat ndëshkimore që do të merren ndaj klubeve apo individëve të veçantë që mund të kenë trukuar direkt apo indirekt këtë sfidë.