Protesta në Prishtinë, lirohet Shpend Ahmeti (FOTO)

Kreu i komunës së Prishtinës, Shpend Ahmeti, është liruar nga policia pak minuta pas arrestimit në sheshin e protestave në Prishtinë.

Ende nuk është e qartë arsyeja e arrestimit të tij. Pasi është liruar, Ahmeti ka deklaruar për mediat se nuk e di arsyen se pse u vu në pranga nga forcat e sigurisë gjatë përleshjeve të dhunshme mes protestuesve dhe policisë.

Në fakt, Ahmeti ishte në mesin e protestuesve gjatë kohës që mes tyre pati përleshje dhe policia po tentonte të qetësonte situatën duke i shpërndarë atë me gaz lotsjellës.

“Nuk e di pse më arrestuan, vetëm më ftoi njëri nga policët, ma dredhoi dorën dhe më çuan në stacionin policor. Posa hyra aty, komandanti i stacionit menjëherë më liroi sepse nuk kishin bazë të më mbanin brenda. Unë si kryetar i Prishtinës, kam të drejt që të protestoj, sepse jam i zgjedhur nga vota e këtyre qytetarëve”, ka thënë Ahmeti pas lirimit.

Reagimi i Qeverisë së Kosovës

Qeveria e Kosovës ka reaguar përmes një komunikate lidhur me protestën e sotme. Në një komunikatë të qeverisë thuhet se qeveria respekton të drejtën për protestë, por po ashtu shprehet kundër dhunës.

Qeveria shpreh shqetësimin lidhur edhe me manipulimin e nxënësve përmes këshillave të nxënësve.

Ja reagimi i plotë i qeverisë:

Qeveria e Republikës së Kosovës e ka përcjellë me kujdes protestën e zhvilluar të martën në Prishtinë dhe dhunën e ushtruar gjatë saj.

Qeveria e Kosovës shpreh përkushtimin e saj për respektimin e plotë të të drejtave dhe lirive të qytetarëve, përfshirë të drejtën e protestës paqësore si një e drejtë e patjetërsueshme e shprehjes së shqetësimeve dhe mendimit qytetar. Por, po ashtu, Qeveria shpreh vendosmërinë që të mos tolerojë zhvillime të cilat cenojnë vendin, institucionet, pronën dhe pasurinë publike e private.

Gjuha kërcënuese e përdorur sot në protestë nga organizatorët e saj është e papranueshme dhe ne i dënojmë aktet e tilla nxitëse.

Po ashtu, manipulimi me nxënës përmes këshillave të nxënësve dhe organizimi i tyre në protestë është manipulim i skajshëm dhe tërësisht i papranueshëm për Qeverinë dhe qytetarët e Republikës së Kosovës.

Qeveria e Kosovës fton qytetarët e Republikës së Kosovës për pjekuri dhe maturi politike dhe qytetare, si dhe për tolerancë, gjë që e ka karakterizuar gjithnjë popullin tonë.

Qeveria dënon dhunën e ushtruar ndaj Policisë së Kosovës, duke i falënderuar policët e Kosovës për profesionalizmin e treguar edhe gjatë kësaj proteste.

Qeveria e Kosovës shpreh vullnetin e plotë që të bashkëpunojë me të gjitha subjektet politike, me shoqërinë civile dhe grupet e ndryshme të interesit për të adresuar të gjitha kërkesat e qytetarëve në rrugë ligjore dhe kushtetuese.

Komuna e Prishtinës: Humbësi Isa Mustafa po hakmerret ndaj protestuesve!

“Kryeministri Isa Mustafa, i cili e humbi Komunën e Prishtinës, tani po përdorë dhunë e brutalitet policor kundrejt protestuesve, të cilët sot ishin mbledhur me mijëra në sheshin kryesor të qytetit për ta kërkuar shkarkimin e Ministrit Jabllanoviq dhe shndërrimin e Trepçës në ndërmarrje publike”, thuhet në njoftimin për media të Komunës së Prishtinës.

“Arrestimi i Kryetarit të Komunës ka ndodhur në ora 14:30”, theksohet më tej në komunikatë.

Reagimi i Jahjagës

Pas këtyre ngjarjeve ka reaguar edhe presidentja e Kosovës Atifete Jahjaga, e cila ka bërë thirrje për qetësi dhe ka dënuar dhunën.

“Skenat kaotike dhe të dhunshme në rrugët e Prishtinës, janë plotësisht të papranueshme. Bëj thirrje për qetësi dhe rivendosje të rendit në rrugët dhe sheshet e kryeqytetit si dhe për reflektim. Ju bëj thirrje protestuesve të mbetur në rrugët e qytetit të Prishtinës që të shpërndahen në mënyrë të qetë dhe të mos vazhdojnë përplasjen me Policinë e Kosovës, një institucion përgjegjës për ruajtjen e rendit dhe të ligjit dhe për sigurinë e secilit qytetar të vendit. Ajo është Policia jonë.