Nishani: Rasti i majorit Feka, përgjegjësi e mazhorancës, pasi më morën kompetencat

Presidenti Bujar Nishani thotë se përfshirja e majorit Sokol Feka në trafikun e drogës, është përgjegjësi e mazhorancës. Kjo, pasi sipas tij, në këtë rast ka dështuar Agjencia e Inteligjencës dhe Sigurisë së Mbrojtjes, e cila, sipas tij, është e politizuar. Nishani thotë se mazhoranca i hoqi kompetencat për të zgjedhur kreun e kësaj agjencie, dhe ndaj ndodhin këto raste.

“Forcat e Armatosura dhe Ushtria e Republikës së Shqipërisë, një vend anëtar i NATO-s ka një performancë të admirueshme të funksionimit dhe ofrimit kontributeve të saj, por rasti konkret ngre një shqetësim dhe në gjykimin tim më të parë, konstatohet një dështim në këtë rast, i Agjencisë së Inteligjencës dhe Sigurisë së Mbrojtjes. Ky ka qenë një shqetësim që unë e kam ngritur edhe më herët, në momentin kur u hoq kompetenca e Presidentit të Republikës, Komandant i Përgjigjëm i Forcave të Armatosura për të bërë emërimin e kreut të inteligjencës së Ushtrisë.

E kam shprehur më tej kur kam konstatuar politizimin e kësaj agjencie, pasi kam qenë dhe mbetem i bindur që largimi nga kornizat e Kushtetutës dhe ligjit, përfshirja në një proces politizimi të institucioneve të tilla dhe të një kontrolli të plotë vetëm të një institucioni, siç është qeveria, krijon dobësi në funksionimin e institucioneve, krijon, për shkak të familjaritetit dhe lidhjeve të tilla për interesin politik, largim nga profesionalizmi dhe e vendos në raporte të tilla, që dalëngadalë fillon dhe dëmtohet efiçenca e funksionimit të institucioneve të tilla. Ky është një rast, i cili duhet parë në këtë kontekst, sesa nuk kanë funksionuar institucionet që kanë për detyrë të hetojnë, monitorojnë, kontrollojnë përfshirjen e ushtarakëve në veprimtari të tilla kriminale. Agjencia përkatëse ka një përgjegjësi të drejtpërdrejtë dhe unë pres të shoh një angazhim të institucioneve, tashmë, që ka në varësi këtë Agjenci, të gjykojnë dhe vlerësojnë me shumë seriozitet këtë situatë”, tha Nishani përABC.