Buxheti social i Presidentit Barack Obama

Dje presidenti i Shteteve të Bashkuara, Barack Obama, publikoi detajet e buxhetit për vitin fiskal 2016, që shkon pothuajse në 4 trilionë dollarë amerikanë, e do të përfshijë një rritje të taksave për më të pasurit (1% e amerikanëve) dhe një përmirësim i të ardhurave për klasën e mesme.

Propozimet, sipas Shtëpisë së Bardhë, do të ndihmojnë familjet punëtore që të ndjehen më të sigurta. Gjithashtu do të përqendrohet në përmirësimin e aftësive të punëtorëve dhe do të ndihmojë në krijimin e kushteve më të mira për biznesin.

Udhërrëfyesi fiskal do të kërkojë miratimin e Kongresit, i cili për herë të parë është i kontrolluar nga republikanët. Informacionet paraprake nga Shtëpia e Bardhë tregojnë se ky udhërrëfyes kërkon të “eliminojë shkurtimet e dëmshme”, duke i dhënë fund shpenzimeve joefikase dhe duke reformuar kodin e taksave me qëllim që të gjithë të paguajnë në mënyrë të drejtë.

Në përputhje me diskursin e përvitshëm për gjendjen e vendit, buxheti i 2016-ës përfshin investime të reja në fushën e arsimit, 750 milionë dollarë do të shkojnë për bursa për arsimin parashkollor dhe më shumë se 3 miliardë në shkencë, teknologji, inxhinieri dhe matematikë.

Buxheti publik do të ndikojë edhe në klasën punëtore në disa drejtime. Ai është i shoqëruara me një reformë të taksash. Të dhënat pozitive ekonomike të tremujorit të fundit kanë përforcuar iniciativën presidenciale për t’i dhënë fund viteve të vështira të shkurtimeve dhe arritjen e qëndrueshmërisë fiskale.

Të premten e shkuar u njoftua se ekonomia amerikane u rrit me 2.4 % në 2014-ën sipas vlerësimeve të para të Departamentit të Tregtisë. Qëllimi ambicioz i Obamës është të reduktojë deficitin amerikan derisa të jetë më pak se 3 % e PBB-së dhe gjithashtu të stabilizojë borxhin. Për ta arritur, ka për qëllim të zëvendësojë “masat shtrënguese pa kuptim me reforma të zgjuara”.

Obama parashikon edhe një taksë të përhershme prej 14% ndaj përfitimeve të përllogaritura në 2,1 trilionë dollarë të grumbulluara jashtë vendit, nga kompani si “General Electric” dhe “Microsoft”, ndërsa duhet të vendoset edhe një taksë prej 19% për fitimet e huaja në të ardhmen prej kompanive amerikane.

Propozohet gjithashtu një rritje prej 7% e shpenzimeve të brendshme dhe ushtarake amerikane. Sa i përket politikës së jashtme, buxheti financon përpjekjet për të mposhtur militantët e Shtetit Islamik dhe për të mbështetur NATO-n dhe aleatët europianë kundër agresionit rus, thotë Shtëpia e Bardhë.