Një koncesion i pazakontë për Tiranën po trazon të majtët

UPDATE –  Këshilltarët e majtë në Këshillin Bashkiak të Tiranës duken të përçarë lidhur me një nga votimet që pritet të shkaktojë jo vetëm replika të ashpra, por ndoshta edhe ndryshime raportesh në linjat editoriale të mediave kryesore në vend.

Votimi ka të bëjë me dhënien me koncesion të 24 mijë vend-parkimeve në Tiranë, një numër që përfshin thuajse të gjitha rrugët kryesore të kryeqytetit në qendër dhe periferi.

Nëse koncesioni miratohet qytetarët e Tiranës do paguajnë thuajse në çdo rrugë të Tiranës kur parkojnë makinën, kudo ku do vendosen aparatë matës-kohe parkimi.

Aktualisht paguhet në vetëm disa rrugë afër qendrës dhe të ardhurat i merr Bashkia.

Por vendimi nëse merret, ia jep të gjithë parkingjet publike të Tiranës dy kompanive private ABT dhe Speed.

Bashkia, pra qytetarët e Tiranës përfitojnë sipas marrëveshjes ende në diskutim vetëm 10 përqind të të ardhurave.

Me një mesatare prej 1 mijë lekësh të vjetra për orë parkimi – potencialisht fitimet janë 24 milionë lekë për çdo orë. Një minierë e vërtetë floriri që shkon për dy kompani private për 35 vitet e ardhshme nëse miratohet.

Kohëzgjatja e pazakontë e një koncesioni të tillë, kushtet në disfavor të qytetarëve të Tiranës dhe përfoljet për personat realë që fshihen pas ABT dhe Speed kanë mbushur me tension orët e fundit qarqet e biznesit dhe medias në Tiranë.

Sipas këtyre të fundit, kompanitë në fjalë përfaqësojnë interesat e pronares kryesore të televizionit Top Channel, Vjollca Hoxha (foto shoqëruese) dhe shtetasit Erjon Isufaj, kunati i famshëm i kryetarit të Bashkisë së Tiranës.

Sipas dokumentave të QKR që konsultoi DITA, kompanitë kanë të dyja të njëjtin administrator dhe personat që shfaqen në dokumentacion janë të gjithë nën 30 vjeç.

Enno Bozdo tha në mbledhjen e mbrëmshme të KB se ky koncesion rregullon “problemin e parkingjeve në Tiranë”.

Naivitetin e qëllimshëm të këtij arsyetimi e vuri në duke Eridian Salianji.

Ky i fundit tha që qytetarëve po u merret ajo që tashmë e kanë, (parkingjet egzistuese) dhe po i detyrojmë t’i paguajnë privatit për çdo parkim publik, provat i cili do vjelë miliona fitime pa investuar asgjë, thjesht duke marrë në zotërim vendet e parkimeve në Tiranë; jo vetëm ato që deri tani i menaxhon Bashkia, por edhe të tjera që deri më tani janë falas – theksoi Salianji.

Shumë zëra kohët e fundit thonë që ky biznes miliardash i shtrirë në një interval kohor prej plot 35 vitesh është tentuar fillimisht nga kunati i Bashës, por më pas ai ka bashkuar në ide pronaren e TCH për ta pasur më të lehtë politikisht miratimin e aferës.

Mes kësaj të fundit dhe kryeministrit Rama sipas të njëjtave zëra, ky koncesion ka qenë shkaku i disa përplasjeve në takime dhe telefonata që kanë kulmuar me daljen publike të drejtorit të TCH në foto me Bashën në një përvjetor në dukje pa rëndësi të PD-së (foto shoqëruese).

Sipas asaj që përflitet prej disa kohësh në Tiranë, TCH ka paralajmëruar madje edhe ndryshimin e vijës editoriale, gjë për të cilën brenda televizionit të madh ka patur konflikte.

Kritikët e z.Rama e shohin këtë rast si një test për të parë nëse të majtët do bashkojnë votat me të djathtët në Këshillin Bashkiak të Tiranës në dëm të qartë të interesave të qytetarëve që përfaqësojnë, por duke siguruar në vijimësi mbështetjen e medias kryesore në vend.

Ende nuk e kanë bërë por presioni duket i fortë.

Këshilli Bashkiak ka 55 vota, 33 e majta dhe 22 e djathta. Miratimi i koncesionit që ka trazuar të majtët kërkon 2 të tretat e këtyre votave.

Votimi mbrëmë është shtyrë pasi të majtët kanë kërkuar më shumë kohë.

Shtyhet votimi, debatet në Këshill

Megjithëse nënkryetari i Këshillit Bashkiak, Njazi Kosovrasti kërkoi që projekti të hidhej dje për votim, me kërkesë të kreut të grupit të këshilltarëve të majtë Genti Gazheli, votimi u shty për të enjten tjetër.

“Ti shkosh banorëve nëpër lagje, nuk është shërbim, as ulje të ndotjes por gjobë. Zgjidhje për mua, kthimi dhe rishqyrtimi i këtij akti. Kreu i Bashkisë është në ikje, por ky koncesion është për 35 vjet, edhe pasi të ikë kreu i bashkisë. Në ikje mos lini gjëma mbrapa. Meqenëse nuk bëtë tramin mos lini këtë akt. Bëni studim më cilësore më të detajuar për këtë projekt”, tha këshilltari i majtë Eridian Salianji.

Enno Bozdo: Kapaciteti total është 42 mijë vende parkimi. 24 mijë në rrugët kryesore të Tiranës, bulevarde etj. Atje ku parkohen shumica e makinave që hyjnë nga rrethet. Mbi 100 mijë hyjnë nga jashtë Tiranës. Nuk po propozojmë diçka që nuk është dhe nuk është dëgjuar asnjëherë. Është një propozim që zgjidh disa gjëra dhe ndihmon në rritjen e të ardhurave për qytetin e Tiranës. Periudha e koncesionit nuk është kurrë 4 vite. Projektvendimi thotë, dyshemeja është 10%. Është kriter i pikëzuar i koncesionit. Unë kërkoj të maksimalizoj të ardhurat e mia, nëpërmjet investimit privat. Këtë nuk e kemi shpikur ne, çdo qytet evropian i ka parkimet e rregulluara. Është një praktikë e njohur. Ne mendojmë që kjo është një procedurë që do të çojë në hapjen e garës, të marrim ofertat. Dhe oferta më e mirë, do të shpallet fituese. Ne duhet ta bëjmë një procedurë të tillë, që edhe qytetarëve ti japim rregullin edhe të rrisim të ardhurat e bashkisë.

Eridian Salianji: A ka studim për këtë projekt?

Enno Bozdo: Studimi dhe propozimi është i vetë bashkisë.

Eridian Salianji: Çfarë ke studiuar tek “Rruga e Qelqit”, çfarë ke studiuar tek rruga “5 Maji”. Keni dalë ndonjë herë në Tiranë, a ka sheshe mes pallateve? Përveç ndërtimeve pa leje që ja latë trashëgim këtij qyteti doni ti lini edhe parkingjet me lekë. Doni të përfitojë bashkia apo xhepat tuaja. Bllokuat parkimet nëntokësore për interesat tuaja. Sot doni të shisni ajrin, po shisni ajrin. Doni të privatizoni pronën e qytetarëve.

Njazi Kosovrasti: Nga ky moment nuk kemi punë me asnjë nga subjektet. Ne nëse do i miratojmë, më pas shpallet një garë. Legjislacioni në fuqi ka rregullat e veta si zhvillohet kjo punë. Parkimet në Tiranë, janë problem, e kemi thënë edhe herë tjetër.

Florian Pullazi: Isha në Vjenë, parkingjet ishin të gjitha të bashkisë. Mos vallë kjo kompani do të krijojë një monopol në treg. Kush është kompania që ka sjellë studimin dhe a është e licencuar për të bërë studimin. Për një periudhë 35-vjeçare ne do të japim me koncesion ambientet e qytetarëve. Më duken shumë 35 vjet. Ju bëj thirrje të gjithë këshilltarëve të mendohen mirë.

Projektvendimi i dorëzuar këshilltarëve të këshillit Bashkiak propozon vlerësimin e formës dhe kritereve për këtë koncesion. Sipas këtij projektvendimi, koncesionari që do të marrë këtë shërbim, do ti paguajë bashkisë vetëm 10% të xhiros vjetore dhe ky është kriteri financiar. Ndërsa nga njëra anë solidarizohet me qytetarët për çmimet dhe taksat, në anën tjetër kryetari i bashkisë rrit barrën e pagesave.

Enno Bozdo: Sot është vetëm hapi i parë i një procedure shumë të gjatë. Është një projekt që duhet mbështetur. Tirana i vetmi vend që nuk e ka një projekt të tillë. Duam të rregullojmë këtë çështje që është bërë shqetësuese për qytetarët e Tiranës. Duhet që të ardhurat të shkojnë në infrastrukturë, rrugë, kopshte, shkolla. Hapja e garës ruan më së miri ruan interesin e qytetarëve të Tiranës.

Genti Gazheli: Në emër të grupit kërkoj shtyrje të vendimit, të na lihet më shumë kohë për të shqyrtuar projektin. Kërkoj edhe një javë kohë.

35 vjet me koncesion për rreth 24 mijë vendparkime publike dhe banorët e Tiranës, duhet të paguajnë kudo tarifë parkimi edhe në zonat deri tani falas.
Bashkëngjitur në projektvendim caktohet edhe pagesa për orë që qytetarët duhet paguajnë, duke variuar sipas zonave të parkimit. Për zona të cilësuar prioritare që ndodhen në qendër, qytetarët duhet të paguajnë 150 lekë për 2 orë parkim ndërsa për zonat që janë më larg qendrës, duke parashikuar edhe parkimet në lagje, pagesa shkon deri në 20 lekë.
Referuar analizës së bërë, në Tiranë ekzistojnë 23 456 vendparkime në rrugë, 13 937 vendparkime në sheshe dhe 4 497 vendparkime në garazhe private.