Pavarësi nga qeveria, Meta detyra për deputetët

Legjislativi kërkon më shumë pavarësi financiare nga ekzekutivi. Në një plan veprimi që mban firmën e Ilir Metës të shpërndarë për komisionet dhe ku ndahen detyrat për deputetët për vitin 2015 theksohet pikërisht kjo gjë. Madje propozohet dhe rishikimi i Kushtetutës për të futur një nen të veçantë për buxhetin e Parlamentit. Ose hartimi i një ligji të posacëm për ta bërë këtë buxhet më të pavarur nga qeveria si dhe ndryshimi i Rregullores së Kuvendit.

“Të shtohet një nen në Kushtetutë për buxhetin e Kuvendit në të njëjtën mënyrë siç është parashikuar për buxhetin e Avokatit të Popullit (neni 60) ose gjykatat (neni 144). Mund të miratohet gjithashtu një ligj i veçantë mbi buxhetin e Kuvendit, i cili parashikon hartimin dhe zbatimin e buxhetit të Kuvendit në mënyrë më të pavarur nga Qeveria. Për të përmbushur kërkesat e një Kuvendi të pavarur financiarisht, duhet të shtohen nene të reja në Rregulloren e Kuvendit”, thuhet në Planin e Veprimit, raporton “AS”.

Problematikat në progres raportin e 2014-s për Kuvendin e Shqipërisë, ku i kërkohet të jetë më transparent në hartimi e ligjeve, të zbatojë vendimet e Gjykatës Kushtetuese për komisionet hetimore dhe të forcojë monitorimin ndaj institucioneve të tjera, kanë detyruar kryeparlamentarin Meta të hartojë këtë  plan të ri pune. Në bazë të tij ndahen detyrat për secilin komision në mënyrë që në progres-raportin e ardhshëm, parlamentit të mos i tërhiqet më veshi. Për këtë arsye kërkohet dhe fuqizimi i rolit monitorues ndaj qeverisë.

“As rregullsia dhe as shpeshtësia e marrjes së informacionit të përditësuar nga qeveria nuk është në nivel të kënaqshëm”, vijon Plani.

Ndër detyrat e ndara për 2015-n është dhe zbatimi i vendimeev të Gjykatës Kushtetuese, kryesisht për komisionet hetimore, pikë kryesore kjo e marrëveshjes që riktheu opozitën në Kuvend.

“Jurisprudenca e Gjykatës Kushtetuese lidhur me qëllimin dhe kufizimet e kontrollit parlamentar nëpërmjet komisioneve hetimore duhet të zbatohet plotësisht nga Parlamenti. Vendimet përkatëse të Gjykatës Kushtetuese duhet të zbatohen pa vonesa të panevojshme”, thuhet në dokument.

Meta u kërkon deputetëve më tepër vëmendje ndaj raportimeve të institucioneve të pavarura dhe të mos neglizhojnë rekomandimet e tyre si në rastin e Avokatit të Popullit apo KLSH. Gjatë 6-mujorit të parë të këtij viti Kuvendi do të hapë 24 zyra në qarqet e vendit për deputetët, pas vërejtjeve të Brukselit se këta të fundit kanë kontakte të kufizuara me zonat e tyre elektorale.