Athina: Gjermania ka fituar 80 mld € nga kriza greke

Ministri i Jashtëm grek, Nikos Kotzias, deklaroi se Gjermania ka fituar 80 miliardë euro nga kiza greke, në mënyrë të drejtpërdrejtë apo tërthorazi. Deklarata është një përgjigje për raportet e vazhdueshme që transmetojnë mediat gjermane për dëmin që po shkakton në vend situata financiare e Greqisë.

Në deklarata për gazetën greke “To vima”, shefi i diplomacisë së Athinës kritikoi gjithashtu sjelljet negative të mediave të komunikimit gjermane kundër një kombi të tërë.

Sipas kancelarit grek, mediat gjermane transmetojnë në disa raste propaganda jo reale mbi dëmet që po u shkakton situata financiare e Greqisë dhe paragjykojnë helenët, gjë që nuk i korrespondon realitetit. Kotzias gjithashtu theksoi se aktualisht më shumë se 60 % e brezit të ri grek është i papunë dhe po përballet me probleme serioze financiare.

Mes të gjithë vendeve evropiane, Gjermania ka qenë një nga më të kritiket ndaj politikave anti-kursim të qeverisë së re të Athinës, e kryesuar nga kryeministri, Alexis Tsipras. Gjatë fushatë së tij elektorale Tsipras premtoi t’i jepte fund programit të kursimit të diktuar në vendin e tij nga kreditorët ndërkombëtarë në këmbim të programit të shpëtimit dhe mbështetjes financiare.

Athina deri tani ka marrë 240 miliardë euro. Greqia është në epiqendrën e krizës së borxhit të eurozonës që filloi në vitin 2008.

Aktualisht dhjetëra mijëra qytetarë sipas Athinës, janë të papunë për shkak të shkurtimeve të aplikuara nga qeveria e mëparshme në këmbim të një shpëtimi prej 240 miliardë eurosh të Bashkimit Europian dhe Bankës Qendrore Europiane.

Por sulmet ndaj Gjermanisë nuk limitohen me kaq, dy ditë më parë Ministri grek i Mbrojtjes, Panos Kamenos, kërcënoi Gjermaninë se do ta “pushtonte” Bashkimin Europian dhe në mënyrë të veçantë Gjermaninë me një valë të paprecedentë klandestinësh.

“Nëse braktisin Greqinë duhet të dinë që emigrantët do të marrin dokumente dhe do të shkojnë në Berlin”, tha Kammenos. “Dhe nëse mes emigrantëve ka edhe terroristë xhihadistë”, vazhdoi ai, “Europa duhet të mbajë këtë përgjegjësi”.

“Nëse na sulmojnë, do t’i sulmojmë edhe ne. Emigrantëve do t’iu japim letrat me anë të cilave do t’iu krijohet mundësia të udhëtojnë në zonën Shengen, kështu që një valë e tyre mund të shkojnë drejt Berlinit”, ka deklaruar Kammenos