Xhelalit i del armiku nga brenda

Xhelal Mziu tashmë ndodhet mes dy zjarreve. Deri pak kohë më parë ai ishte një personazh që sulmohej nga kundërshtarët e tij politik, madje edhe u arrestua nga drejtësia. Por ditët e fundit situata për të ka ndryshuar. I bindur se kishte mbështetjen e PD-së, Mziu ecte i qetë në rrugën e tij për një tjetër mandat duke nisur edhe fushatën.

Madje aq i sigurt ishte sa shpërndau çmime edhe për mediat pranë Bashës dhe gazetarët e tyre( nuk ka javë që Xhelati të mos shfaqet me një çmim në dorë në faqen e tij në Facebook, ai mund të thyej rekordin Guinnes). Por ëndrra duket se po i ndërpritet në mes. Një socialit, i konvertuar në demokrat po kërkon t’i ndërpres karrierën.

Asllan Dogjani ish-deputeti i PS-së ka kërkuar zyrtarisht të jetë kandidati i Partisë Demokratike për zgjedhjet vendore të 21 qershorit në bashkinë e Kamzës. Këtë njoftim Dogjani e ka bërë në rrjetet sociale, por i ka shkruar zyrtarisht edhe kryesisë së PD-së. Në facebook-un e Mziut kanë nisur sulmet ndaj Dogjanit duke e quajtur një socialist që s’ka lidhje me PD. Xhelali nuk ka bërë reagime ndaj këtyre ngjarjeve, por as nuk i ka fshirë komentet që sulmojnë konkurrentin e tij.

Një prej komentuesve i kujton një këngë partizane Xhelalit duke vendosur vargjet në profilin e tij në Facebook. “Mora pushkën dola malit për atdhe, nuk e dija se armiku ishim ne”, shkruan ndjekësi e Mziut. Po ta shohim hollë-hollë, Dogjani është jabanxhi në parti, ndoshta Xhelali nuk ia ka ndjerë rrezikun.