Skënderbeu kërkon të shfrytëzojë momentin dhe përballë Apolonisë sheh mundësinë për të zgjatur hapin në rrugën drejt titullit kampion, që do të vendoste dhe rekordin e 5 trofeve radhazi. Korçarët vijnë pas triumfit 5-2 ndaj Partizanit dhe duken të kenë kaluar nga ferri në parajsë brenda një kohe fare të shkurtër.
Humbjet ndaj Laçit në kampionat dhe Kukësit në kupë janë harruar nga rezultati i arritur ndaj 15 herë kampionëve, që ka shtuar dozat e optimizmit brenda grupit. Trajneri Josa do të ketë rikthime të mëdha pasi mbrojtja do të kompletohet me Vangjelin dhe Abazin, si dhe mesfushorin Nimaga.
Për kampionët kjo është përballje e rëndësishme jo vetëm sepse mund të zgjasë më shumë diferencën me ndjekësit në klasifikim, por për të përgatitur një javë impenjative që i dhuron dy përballje me Kukësin, në sfidën e kthimit në kupë dhe më pas në kampionat. Për këtë arsye përballja me Apoloninë tek Skënderbeu, vlerësohet po aq e rëndësishme sa ajo ndaj Partizanit. Edhe pse dueli është me një skuadër që luan për mbijetesë, përballjet e këtij sezoni kanë treguar se fierakët nuk janë të lehtë për tu mundur.
Kujtimet e fitores 6-0 të fazës së dytë janë të freskëta tek të dyja skuadrat, pasi mbetet rezultati më i thellë i këtij kampionati, por bardhejeshilët kanë ndryshuar shumë, teksa do të zbresin ndaj kampionëve me dy ish kampionë, si Dimo dhe Ribaj. Paraqitja e Apolonisë në javët e fundit ka ardhur në rritje, me armatën e drejtuar nga Artan Mërgjyshi që shpreson tek mrekullia.